Бүгін Сырым ауданында 1 мамыр – Қазақстан халықтарының бірлігі күніне арналған “Қазақстан – достық пен бірліктің мекені” атты мерекелік шара өтті.
Аудандық мәдени демалыс орталығының ұйымдастыруымен өткен салтанатты кешке аудан тұрғындары жиналып, басты құндылық - ынтымақты ту қылып көтерді. Сахна төрінде ауданымыздың талантты көркемөнерпаздары өнер көрсетіп, ән мен жырдан шашу шашты. Әр ұлттың мәдениетін дәріптейтін қойылымдар мен ұлттық билер көрермендерге ерекше әсер сыйлады.
Мерекелік жиынның шымылдығын аудан әкімі Жұмагелді Батырниязов ашып, жиналған жұртшылықты айтулы мерекемен құттықтады.
– Құрметті жерлестер! Сіздерді 1 мамыр – Қазақстан халықтарының бірлігі күнімен шын жүректен құттықтаймын! Бұл – татулық пен тұрақтылықты ту еткен, сан түрлі ұлт пен ұлыс өкілдерінің бір шаңырақ астында тату-тәтті өмір сүріп жатқанын айшықтайтын ерекше мереке. Біздің басты байлығымыз – ел ішіндегі ауызбіршілік пен өзара сыйластық. Осындай береке-бірліктің арқасында ауданымыз да жылдан-жылға дамып, өркендеп келеді. Алдағы уақытта да осы ынтымақты сақтап, жас ұрпаққа үлгі ету – баршамыздың ортақ міндетіміз. Әр шаңыраққа амандық, денсаулық, бақ-береке тілеймін! Бірлігіміз бекем, тірлігіміз көркем болсын! – деді аудан басшысы.
Қоңдыкер Елеуов,
Сырым ауданы
