Көмір өнеркәсібі форумында Энергетика вице-министрі Санжар Жаркешов баяндама жасап, саладағы маңызды өзгерістерді жария етті, деп хабарлайды ведомство баспасөз қызметі.
Фото: pixabay.com
Вице-министрдің айтуынша, жаһандық энергетикалық трансформация жағдайында Қазақстан көмірді жай ғана отын ретінде жағудан бас тартып, оны жоғары қосылған құны бар өнімдер шығаруға мүмкіндік беретін бағалы шикізат ретінде қарастыруды көздеп отыр. Бұл мақсатты жүйелі іске асыру үшін Энергетика министрлігі нарық қатысушыларымен бірлесіп, 2026-2031 жылдарға арналған көмір химиясы саласын дамыту жөніндегі арнайы Жол картасын әзірледі.
Санжар Жаркешов бұл қадам дәстүрлі өндірісті сұранысқа ие химиялық өнімдер шығаруға бағыттап, жаңа кәсіпорындар құруға және еліміздің экспорттық әлеуетін айтарлықтай кеңейтуге жол ашатынын атап өтті.
Қазіргі уақытта Қазақстанда көмір негізінде металлургиялық кокс пен синтетикалық отын өндіру жобалары сәтті іске асырылуда. Бұған қоса, көмірден газ, аммиак, карбамид және терең өңделген өнімдердің басқа да түрлерін алу бойынша жаңа бастамалар жан-жақты пысықталып жатыр.
Форум аясында инвесторларды тарту мақсатында мемлекет тарапынан жасалатын ауқымды қолдау шаралары да таныстырылды. Саланы дамытудың басты факторы ретінде өнімді өткізу нарығына кепілдік берілмек. Мемлекет пен ұлттық компаниялар көмір химиясынан алынатын өнімдерге, соның ішінде тауарлық газға, жанар-жағармай материалдарына және олефиндерге ұзақ мерзімді офтейк-келісімшарттар жасасуға дайын екендігін жеткізді. Бұл отандық өнеркәсіпті жаңғырту мен тұрақты дамуды қамтамасыз етудегі үлкен серпіліс болмақ.
