Дәл осы тақырыпта Бөкей ордасы ауданында бір емес бірнеше кәсіби мерекеге арналған салтанатты жиын өтті.
Таратып айтсақ, 23 маусым - мемлекеттік қызметшілер мен полиция қызметкерлерінің, 24 маусым - судья және сот саласы қызметкерлерінің кәсіби мейрамы.
Салтанатты жиын әдеттегідей, көк байрағымыздың кіргізілуімен, Мемлекеттік гимнмен басталған мерекелік шара аудан әкімі Нұрлыбек Даумовтың құттықтау сөзімен басталды.
- Мемлекеттік қызмет – үлкен жауапкершілік пен жоғары кәсібилікті талап ететін абыройлы міндет. Осы жауапты қызметті абыроймен атқарып жүрген мемлекеттік қызметшілер, полиция қызметкерлері мен сот саласының мамандарын бүгінгі мейраммен құттықтаймын. Бастарыңызға амандық, дендеріңізге саулық, отбасыларыңызға бақ-береке тілеймін, - деді өз сөзінде аудан басшысы.
Бұдан соң аудан әкімі Нұрлыбек Даумов мемлекетіміздің тұрақтылығы мен дамуына, заң үстемдігі мен қоғамдық тәртіптің сақталуына қызмет етіп жүрген кәсіби мереке иелерін облыс әкімі Н.Төреғалиевтің атынан және өз атынан марапаттады.
Құттықтауды аудандық мәслихат төрағасы Лариса Қайырғалиева жалғастырып, аудан прокуроры Жұмабай Ермеков, аудандық полиция бөлімінің бастығы Бақберген Молдағалиевпен бірге мемлекетіміздің гүлденуі, қоғамымыздың тыныштығы мен бейбіт те әділетті өмірімізді қамтамасыз ету жолында еселі еңбек етіп жүрген қызметкерлерді марапаттады.
Мемлекеттік қызметке жаңадан кірген жас мамандар салтанатты түрде ант қабылдап, салтанатты жиын мемлекеттік қызметшілер мен полиция қызметкерлері, аудандық демалыс орталығы көркемөнерпаздары дайындаған концерттік бағдарлама ұласты.
Бұл концерттік бағдарламаның басқа концерттерден өзгешелігі сол, шенділеріміз де, әкімдеріміз бен мемлекеттік қызметкерлеріміз ән салып, би биледі, мәдениет қызметкерлерімен тамаша дуэт те құрды.
Анар Артықбай,
Бөкей ордасы ауданы
