Сурет: istockphoto.com
Жеке сот орындаушысының оның жүргізуші куәлігінің қолданысын уақытша тоқтата тұру және жаңа санаттағы құқықтарды алуға тыйым салу туралы ұсынысын қанағаттандырған төменгі сатыдағы соттардың шешіміне дау айтып, кассациялық инстанцияға Қазақстан азаматы шағым түсірген.
Іс материалдарына сәйкес, атқарушылық өндіріс бойынша ер адамның 62 миллион теңгеден астам өтелмеген берешегі бар. Осы уақыт ішінде сот орындаушысы заңда көзделген шаралардың толық кешенін қолданған: мүлікке арест қойған, инкассолық өкімдер жіберген, борышкердің Қазақстаннан тыс жерлерге шығуына шектеу қойған және мүлікке іздеу жариялаған. Соған қарамастан, сот шешімі орындалмаған.
Сотта азамат жүргізуші куәлігі ол үшін табыс көзі екенін алға тартты. Алайда ол бұл уәждерін құжат жүзінде дәлелдей алмады.
Сонымен қатар сот шешімін ұзақ уақыт бойы орындамауды ақтайтын дәлелді себептерді сот таппады.
Кассациялық сот қандай шешім шығарды?
Кассациялық сот "Атқарушылық іс жүргізу және сот орындаушыларының мәртебесі туралы" заң борышкер қомақты соманы өндіріп алу туралы сот актісін орындаудан дәлелді себепсіз жалтарған жағдайда, арнайы құқықты уақытша шектеуге мүмкіндік беретінін атап өтті.
Сот бұған дейін қабылданған шаралардың нәтиже бермегені туралы қорытындыға келді, сондықтан жүргізуші куәлігін уақытша шектеу заңды әрі атқарушылық іс жүргізу мақсаттарына сәйкес келеді.
Қарау қорытындысы бойынша кассациялық шағым қанағаттандырусыз қалдырылды, ал бірінші және апелляциялық сатыдағы соттардың шешімдері өзгеріссіз қалды.
