Аймақ басшысы Нариман Төреғалиев білім беру саласында еселі еңбек етіп, жоғары нәтижелерге қол жеткізген мамандарға мемлекеттік наградалар табыстады. Атап айтқанда, Президент Жарлығына сәйкес №47 жалпы орта білім беретін мектептің мұғалімі Айымгүл Диярова және Оқушылар сарайының директоры Шолпан Сисенова «Ерен еңбегі үшін» медалімен марапатталды.
Облыс әкімі Мемлекет басшысы Қасым-Жомарт Тоқаев бастамашы болған Халықтық Конституцияда адами капиталды дамыту, білім мен инновацияны ілгерілету стратегиялық басымдық ретінде бекітілгенін атап өтті. Өңір басшысы жас ұрпақты тәрбиелеу ісінде ұстаз еңбегі өлшеусіз екенін алға тартты.
- Президент Тамыз конференциясының пленарлық отырысында «Мықты мұғалім – сапалы ұлттың тірегі» деді. Шын мәнінде, ұстаз – ұлт болашағын қалыптастыратын ең жауапты мамандық иесі. Технология әлемді өзгерте алады, ал адамның дүниетанымын өзгерту – нағыз ұстаздың ғана қолынан келеді. Сіздерге ерен еңбектеріңіз үшін алғыс айта отырып, мәртебелі марапаттарыңызбен құттықтаймын!, – деді Нариман Төреғалиев.
Облыс әкімі ұстаздарға шығармашылық жетістіктер мен толайым табыс тіледі. Өңірде білім беру инфрақұрылымын дамыту, білікті педагогтер мен дарынды шәкірттерді қолдау шаралары жүйелі жалғасатынын жеткізді.
Айта кетейік, Шолпан Сисенова 31 жыл, ал Айымгүл Диярова 37 жылдан бері білім беру саласында абыройлы еңбек етіп келеді. Қос ұстаз мемлекеттік марапатқа қол жеткізуде педагогикалық ұжымның да үлесі бар екенін айтып, жауапкершілік жүгі арта түскенін атап өтті.
БҚО әкімінің баспасөз қызметі
