Кеше 8 қыркүйек күні Үкімет отырысынан кейінгі брифингте мұғалімдерді мазалауға шектеу қою және ата-аналар чатына регламент бекіту мәселелері талқыланды. Бұл жөнінде kaz.inform.kz хабарлады.
Сурет: Сайт архивінен
Оқу-ағарту министрі Жұлдыз Сүлейменова жұмыстан тыс уақытта ұстаздарды орынсыз мазаламау жөнінде мәлімдеме жасады.
Журналистер одан ата-аналар чатына арнайы регламент бекіту жайында сұрады.
Министр алдымен мектеп оқытушыларының ауыр жүктемесі мен игі жұмысына көңіл аударғысы келетінін айтты. Мұғалім күніне кем дегенде 6 сағат аудиториямен жұмыс істейтіндіктен, бұл мәселе өте өзекті.
— Бастауыш сыныптары мен емтихан сыныптарындағы мұғалімдердің жүктемесі одан да ауыр. Әрине, сабақ біткеннен кейін де ата-аналардың жедел әрі маңызды сұрақтары болуы мүмкін. Ондай жағдайда біздің ұстаздарымыз міндетті түрде балалардың ата-аналарына хабарласып, мәселенің шешілуіне атсалысады. Бірақ кез келген ұсақ-түйекке бола, жұмыстан тыс уақытта мұғалімдерді мазаламайтын қоғамдық этиканың жаңа нормасын ұсынамын. Себебі, ұстаздарымыздың жұмыстан тыс уақытында жеке өмірі бар, — деді Жұлдыз Сүлейменова.
Оның сөзінше, мұғалімдер тынығып, зейінін қалпына келтіріп, эмоциналды түрде келесі күнге дайын келуі керек. Сондықтан министр ата-аналар қоғамдастығына мұндай үндеу жасап отыр.
— Ұстаздардың жүктемесі туралы ата-аналар да ойларын айтады. Қандай мәселемен жедел хабарласу керек, қандай мәселені ертеңге қалдыруға болады — бұл норманы, этиканың жаңа стандартын бірлесіп шешеміз деп ойлаймын, — деді Жұлдыз Сүлейменова.
Сонымен қатар, ол биыл 4,1 млн бала мектепке барғанын еске салды. Демек, 8 миллиондай ата-ана бар. Ал ұстаздар саны — 420 мың. Осы дерек арқылы министр елімізде 1 мұғалімге 19 ата-анадан келетінін меңзеді.
Алпамыс Файзолла
zhaikpress.kz
