ҚР Тұңғыш Президенті күніне орай Алматы қаласындағы Әл-Фараби атындағы Қазақ ұлттық университетінде «Men jastarǵa senemin» атты студент жастардың VI республикалық патриоттық форумы өтті.
Шараны жыл сайын ҚР Білім және ғылым министрлігі, ҚР Жазушылар Одағы, «Жас Отан» жастар қанаты және Алматы қаласы әкімдігінің қолдауымен Әл-Фараби атындағы Қазақ ұлттық университеті мен «Жандану» экологиялық жобасы ұйымдастырады.
Форум тақырыбына сай инновациялық жобалар, студенттік эссе, патриотық әндер, студенттік поэзиялық азаматтық-патриоттық шығармалар байқауы ұйымдастырылды. Поэзиялық байқауға еліміздегі 70 жоғары оқу орнынан келген жас ақындар қатысты. Мүшәйрада М.Өтемісов атындағы БҚМУ-дың II курс студенті Төрехан Насиев «Рух», «Достық даңғылы» өлеңдерін оқып, жүлделі екінші орын алып, ноутбук иеленді. Қазылар алқасына танымал ақын Бақыт Беделхан төрағалық етті.
Төрехан Насиев – Жәнібек ауданының Ақоба ауылындағы Х.Халиуллин атындағы мектептің түлегі. Қазіргі уақытта М.Өтемісов атындағы БҚМУ-дың қазақ филологиясы факультетінің екінші курсында оқиды. Төрехан бұған дейін де республикалық, аймақтық деңгейдегі мүшайралар мен көркемсөз оқуларының жеңімпаз-жүлдегері атанған талантты жас.
Нұртай ТЕКЕБАЕВ
zhaikpress.kz
Батыс Қазақстанның маңызды жаңалықтарын біздің Instagram және Telegram парақшамыздан алғашқы болып біліңіздер
