Қазақстан халқы Ассамблеясының 25 жылдығы шеңберінде «Тұңғыш Президент жолымен» халық экпедициясының эстафетасын Орал қаласы Ақжайық ауданына табыстады.
Эстафета қонақтары қалыптасқан дәстүрге сай алдымен ақиық ақын Жұбан Молдағалиевтың ескерткішіне тағзым етті. Осыдан соң шара қатысушылары түрлі категория бойынша бес диалогтық алаңға бөлініп, еркін форматта пікір алмасты. Айта кетер болсақ, бірінші алаңда жиналғандар «Қоғамдық келісім мен жалпыұлттық бірлікті нығайтудағы Елбасының тарихи рөлі» тақырыбында ойларымен бөліссе, «Ата сөз – бата сөз» диалогтық алаңында Орал қаласының және ауданның ақсақалдары ұрпақ тәрбиесі мен елдікті, тыныштықты сақтау жөнінде әңгіме-дүкен құрды.
Үшінші диалогтық алаңда басқосқандар ел Президенті Қ.Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауындағы және Елбасының «Рухани жаңғыру» бағдарламасында белгіленген міндеттерді шешудегі БҚО ҚХА аналар кеңесінің атқарған жұмыстары жөнінде ой-пікірлерін ортаға салса, үкіметтік емес ұйым өкілдері, ауылдық округ әкімдері, аудан жастары Ассамблея жұмысының қарқын алуына Тұңғыш Президентіміз Н.Ә.Назарбаевтың қосқан өлшеусіз үлесі және жергілікті этномәдени бірлестіктер қызметінің нәтижелерін талқылады. Сондай-ақ кәсіби емес медиаторлар мен құқық қорғау органдарының қызметкерлері бас қосқан келесі пікірсөз алаңында медиация тәртібі мен билер кеңесі жұмысының артықшылығы әңгіме болды.
Эстафета бағдарламасы түстен кейін аудандық мәдени-демалыс орталығында жалғасын тапты. Мұнда «Елбасы жолымен» фото көрмесі ұйымдастырылып, көрерменге қала көркемөнерпаздары концерті ұсынылды. Мәдени шараның соңында Орал қаласы әкімінің орынбасары Бақытжан Нарымбетов құттықтау сөз сөйлеп, Ақжайық ауданының әкімі Қалияр Айтмұхамбетовке эстафетаны жалғастыру кезегін табыстады. Қалияр Шадиярұлы келген қонақтарға ықылас гүлін тарту етіп, Жұбан елі атынан зор ризашылығын білдірді.
Рауан Сатыбалдиев
фото авторы: Нұрбек Ихсан
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
