Ақсай қаласының «Қарашығанақ» спорт кешенінде гір спортынан және қол күресінен жасөспірім ұлдар, ерлер мен әйелдер арасында Батыс Қазақстан облысының чемпионаты өтті.
Чемпионаттың ашылу салтанатына Бөрлі ауданы әкімінің орынбасары А.Көшкінбаев, БҚО гір спорты федерациясының президенті М.Ибатов және БҚО гір спорты түрінен спорт ардагері К.Коломолецтер қатысып, спортшыларға сәттілік тіледі.
БҚО гір спорты федерациясының президенті М.Ибатовқа аудан әкімдігі мен аудандық дене шынықтыру және спорт бөлімінің алғыс хаттары табысталды.
Сонымен жарыстың алғашқы күні гір спортының мықтылары сынға түсті. Барлығы жеті команда қатысқан сайыста жерлестеріміздің бағы жанып, бірінші орынды иеленді. Ал көршілес Шыңғырлау ауданы командасы екінші, Орал қаласы командасы үшінші орыннан көрінді.
Екінші күнгі қол күресі сайысына сегіз командадан 120 спортшы қатысты. Онда командалық есеп бойынша Орал қаласының командасы мықтылықтарын танытып, үздік атанды. Бөрліліктер екінші орынға табан тіресе, сырымдықтардың еншісіне үшінші орын бұйырды.
Жеңімпаз командаға республикалық чемпионатқа жолдама берілді.
Мейрамбек Сыдықов
Бөрлі ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
