Бәйтерек ауданына қарасты Қ.Аманжолов атындағы орта мектептің 11-сынып оқушысы Бақтыбай Тәжімұратов жоғары оқу орнының грантын ұтып алды.
«Білімді ұрпақ – ел болашағы» атты облыстық зияткерлік сайысының «Туған жер – тұнған тарих» бағыты бойынша байқауға қатысқан бәйтеректік дарынды жас Бақтыбай Тәжімұратов терең біліміне қоса, жоғары қабілеттілігімен ерекшеленіп, жүлделі ІІІ орын алғаны үшін Жәңгір хан атындағы Батыс Қазақстан аграрлық-техникалық университетіне тегін оқу құқығын беретін грантты жеңіп алды.
Болашағынан үлкен үміт күттіретін Бақтыбайдың жетекшісі – Қ.Аманжолов атындағы орта мектептің тарих пәнінің мұғалімі Ақзила Дәкешова мен Бәйтерек аудандық жас туристер стансасының экология бөлімінің меңгерушісі, қосымша білім беру педагогі Асхат Бекешов.
Байқауға қатысарда Бақтыбай Тәжімұратов Бәйтерек ауданы бойынша тәлімгерлердің ықпалымен бейнекөрсетілім дайындап, нәтижесінде ІІ кезеңге жолдама алған 17 үміткердің бірі болды. Одан кейінгі өткен Қазақстан тарихы бойынша тест жұмыстары, зияткерлік сайыстарында да ерекше қабілетімен көзге түсе білді.
Байқау қорытындысы бойынша Б.Тәжімұратовқа Жәңгір хан атындағы Батыс Қазақстан аграрлық-техникалық университетіне тегін оқу құқығын беретін грант сертификаты табыс етілді. Сертификаттың ерекшелігі, түлек қалауы бойынша таңдаған факультеттің студенті атана алады.
Ертай Бимұханов
Бәйтерек ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
