14 қыркүйек күні С.Садықов атындағы аудандық мәдени-демалыс орталығында Тәуелсіздігіміздің 30 жылдық мерейтойы аясында отбасы құндылықтарын насихаттау мақсатында «Отбасым – алтын діңгегім» атты тағылымды танымдық кездесу өтті.
Тағылымы мол шараның ұйымдастырушысы, әрі жүргізушісі – Казталов ауылдық округі аналар кеңесінің төрайымы Нұрия Хабибуллина.
Өскелең ұрпаққа отбасы құндылықтары мен дәстүрімізді дәріптеу бағытындағы шараға «Мерейлі отбасы - 2021» байқауының қатысушылары Бақытжамал Жұмағалиева анамыз бен Нұрболат Шалашовтар шаңырағы болды.
Шара барысында батыр ана Бақытжамал Жұмағалиева өзінің өмірі мен отбасылық тәрбие, салт-дәстүрден сыр шертсе, Нұрболат Шалашовтың отбасы ұлттық құндылықтарымызды насихаттауға қосып жүрген үлесі жөнінде әңгімелеп, жырдан шашу шашты.
Тағылымды шарада Бақытжамал анамыз «Ақ орамал» науқанына үн қоса отырып, Нұрболат Шалашовтың жарына орамал жауып, салт-дәстүрімізді түлетті.
Тағылымды шара соңында Казталов ауылдық округінің әкімі Ернар Ғалымов шара қонақтарын Отбасы күнімен құттықтап, жылы лебізін білдіріп, қос отбасыға арнайы алғыс хат пен естелік сыйлық табыстады.
Ауылдық округтің ардагерлер кеңесінің төрағасы Мұқанғали Бектілеуов те шараның ұйымдастырушылары мен қонақтарына ризашылығын білдірді. Санитарлық талаптарды сақтай отырып өткен шараны С.Садықов атындағы аудандық мәдени-демалыс орталығының әншілері әсем әнмен әрледі.
Бекарыс Әбіш,
Казталов ауданы
zhaikpress.kz
