Таяуда «Балалар жылын» қолдау мақсатында қазақ күресінен 2008-2014 жылы туған жасөспірімдер арасында «Орал» спорт клубы ашық турнир ұйымдастырған болатын. Аталмыш турнирге Атырау облысынан алты команда, Ақтөбе облысы, Жекпе-жек спорт клубы, Сырым, Қаратөбе, Бәйтерек, Бөкей Орда, Шыңғырлау және Жаңақала аудандарынан 250-ге жуық палуандар бақ сынасты.
Жарыс қорытындысында 2012-2014 жылы туылған жасөспірімдер арасында Ақболат Амангелдіұлы 32 келі салмақ дәрежесінде ІІІ орын, 2010-2011 жылы туылған жасөспірімдер арасында Аңсат Мұханбетқали 46 келі салмақ дәрежесінде ІІ орын, Әсет Махамбет 46 келі салмақ дәрежесінде ІІІ орын, 2008-2009 жылы туылған жасөспірімдер арасында Ержан Мейірбек 35 келі салмақ дәрежесінде ІІІ орын, Мақсат Мұратқали 46 келі салмақ дәрежесінде І орынға ие болды.
- Шәкірттерім жақсы күресе білді. Жарысқа қатысу арқылы көп тәжірибе жинақтады. Осындай үлкен додаға қатысуға қолдау білдірген барша палуандарымның ата-аналарына алғысымды білдіремін. Командалық есепте Жаңақала ауданы жүлделі ІІІ орынға ие болды. Біз бағындырар белестер әлі алда. Бұдан да үлкен жетістіктерге жету үшін жаттығып, жұмыстана береміз. Жеңісті күндеріміз көп болсын! – дейді Әділет Қалиарыстанов.
Арайлым Айденова,
Жаңақала ауданы
zhaikpress.kz
