Бүгін Достық үйінде «Менің өлкемнің тарихындағы отбасымның тарихы» атты эссе байқауының жеңімпаздары марапатталды.
Облыстық прокуратураның тапсырысымен, облыстық білім басқармасының қолдауымен «Жайық таңы» қоғамдық бірлестігінің ұйымдастырумен өткен байқауға 300-ден астам жас өрен қатысты. Тәуелсіздікпен тұспа-тұс келген айшықты шараға қатысқан облыс әкімінің орынбасары Серік Егізбаев прокуратура органдарының туған өлке, отбасы құндылықтарын насихаттау бағытындағы жобаларға қолдау танытуы өзгелерге үлгі боларлық екендігін атап өтті.
Ұлттық дәстүр мен отбасылық құндылықтарды жас ұрпақтың санасына сіңіру, отбасылық қарым-қатынасты нығайту мақсатында өткізілген байқау қорытындысында арнайы құрылған комиссияның шешімімен 16 жұмыс үздік деп танылған. Байқау нәтижесінде жаңақалалық Дильназ Дидарқызы – бірінші, шыңғырлаулық Ботагөз Сапиева мен бөкейордалық Ерасыл Сатыбалды – екінші, қаратөбелік Лаура Аблаева, оралдық Әділ Мұқашев және казталовтық Гүлназ Талғатова – үшінші орынды иеленді.
Айта кету керек, бірінші орын - 300 мың, екінші орын - 200 мың, ал үшінші орын алған жеңімпаздар 100 мың теңгенің сертификаттарымен және алғыс хаттармен марапатталды. Сондай-ақ тағы 10 жүлдегерге «Sulpak» СҮ-нің арнайы сертификаттары берілді.
Гүлжамал Жолдығали,
zhaikpress.kz
