Қыркүйек айының 23-26-сы аралығында Ақжайық ауданы Тайпақ ауылында ересектер арасында ұлттық ат спорты түрлерінен БҚО чемпионаты өтті. Тайпақ ауылынан шыққан елге танымал спортшыларды еске алуға арналған жарысқа Қаратөбе ауданының ұлттық ат спорты құрама командасы қатысқан болатын.
Ұлттық ат спорты түрлері көкпар, аударыспақ, теңге ілу, жамбы атудан өткен дүбірлі дода тартысты өтті. Қазақтың қанына біткен ат спорты түрлерін дамытуға арналған біріншілікте қаратөбелік жігіттер де жақсы нәтеже көрсетті.
Атап айтсақ аударыспақтан 100 келі салмақ дәрежесінде Мәди Николаев чемпион атанды. Сонымен қатар аударыспақтан 74 келіде Мұратбек Табылдиев, 82 келіде Қайырбек Сағындықов, + 100 келі салмақта Бауыржан Қадырғалиевтер жүлделі ІІІ орындардан көрінді.
Ұлттық ойын саналатын көкпардан сегіз команда арасында өткен қызу тартыста жерлестеріміз бесінші орынға табан тіреді.
Серікбай Хасанов,
Қаратөбе ауданы
zhaikpress.kz
