Қазан айының 22-27 күндері Орал қаласында Мемлекеттік сыйлықтын лауреаты, Қазақстанның халық жазушысы Қадыр Мырза Әлиді еске алуға арналған тоғызқұмалақтан жасөспірімдер мен жастар арасындағы ашық республикалық турнирі өткізілді. Аталмыш жарысқа Нұр-Сұлтан қаласы, Ақтөбе облысы, Байғанин ауданы, Маңғыстау облысы, Қызылорда облысы, Орал қаласы және өңіріміздің Бәйтерек, Жаңақала, Тасқала, Сырым аудандарының командалары қатысты.
5 күнге созылған тартысқа толы бәсекеде 11-жас ұлдар арасында Нұрәлі Арматұлы І орынды иеленіп жеңімпаз атанса, Бейбарыс Жолдасқали ІІ орын алды. Бекнұр Тұрсынбай ІІІ орынға табан тіреді. 13-жас ұлдар арасында Мадияр Жұмағали күміспен күптелсе, Нұрберген Түсіпқали қола жүлдені қанжығасына байлады. 20-жасқа дейінгі қыздар арасында Жаңақала спорт мектебінің түлегі Ақгүл Бауыржанқызы алтыннан алқа тақты.
Республикалық ақыл-ой додасы аяқталған соң Азия чемпионатына іріктеу болды. Нәтижесінде 13-жас ұлдар арасында бақ сынаған Бейбарыс Ғалымжанұлы жеңімпаз атанса, 13-жас қыздар арасында сынға түскен Айназ Амангелдіқызы жеңістің ең биік тұғырынан көрінді. Нұрберген Арматұлы осының алдында өткен Семейдегі жарыстың қорытындысы бойынша іріктеусіз жолдаманы иеленді.
- Әрбір жарыс бапкер мен жас спортшыларды шыңдайтыны сөзсіз. Бұл жарысқа баруға қолдау көрсеткен аудан әкімі Дархан Әмірханұлына және жеке кәсіпкерлер Саламат Сертековке, Махмұт Ешкаевқа, Қамбар Каменовке, Аманжол, Берген Ибрашевтарға өзімнің және ұжымымның атынан ризашылығымды білдіремін. Жарысқа жасөспірім спортшыларды баптап, бар білгенін үйретіп, аудан атын шығаруға үлес қосып жүрген тоғызқұмалақ үйірмесінің бапкері Қайрат Шаутеновке де айтар алғысым зор. Азияға жолдама алудың өзі үлкен олжа, - дейді аудандық балалар жасөспірімдер спорт мектебінің директоры Жайсаң Есекенов.
Жанайдар Болатбекұлы,
Жаңақала ауданы,
zhaikpress.kz
