29 қаңтар күні облыс әкімі Ғали Есқалиев іссапармен Теректі ауданына барды.
Өңір басшысы Ақжайық ауылдық округіне қарасты Абай ауылының маңындағы «Масқар» ауыл шаруашылығы өндірістік кооперативінің жұмысымен танысты. 2017 жылы құрылған «Масқар» АШӨК төрағасы Айбек Борисов. Абат Нұрғалиев, Бекжан Кайнекешов – АШӨК құрылтайшылары. Қызметтің негізгі бағыты – мал басы санын көбейту, кооператив мүшелерінің ірі қарасын асылдандыру.
2021 жылы 20 сәуірден бастап мал бақташысын жұмысқа қабылдап, ауыл тұрғындарының ірі қара малын бағуды қолға алған. Қазір 260 бас ірі қараны бағып-баптауда. Малды суаруға арналған құдық бар. 2021 жылы шілде айында Абай ауылының 20 тұрғыны «Масқарға» мүшелікке қабылданған. Мүшелікке қабылданған тұрғындар арасынан 16 тұрғын мемлекет тарапынан берілетін қайтарымсыз грант алып, қаражатты толықтай кооперативке аударған. Қазіргі таңда «Масқар» АШӨК жаз мезгілінде бағымға қосылған асыл тұқымды бұқаларды қыстақта ұстап отыр.
Ақжайық ауылындағы жеке инвестициялық жоба болып табылатын «Айша» жеке бөбекжайы да халыққа сапалы қызмет көрсетуде. Ғимарат 1982 жылы салынған. Мекеменің заңды иесі Қайырғали Ахметәлиев. Светлана Хайруллина - балабақша меңгерушісі. Бөбекжайда 13 адам жұмыс жасайды. 1 меңгеруші, 6 педагог-тәрбиеші, 1 әдіскер балалардың жан-жақты дамуы жолында тер төгуде.
Қазіргі таңда бұл бөбекжайда 75 бала тәрбиеленуде. Көлемі 413 шаршы метрді құрайтын 1 қабатты ғимаратта 5 бөлме бар. Көгілдір отынмен жылытылады. 50 пайыз несие, 50 пайыз өз қаражаты есебінен мекеме иесі 2020-2021 жылы 23,0 млн теңгеге күрделі жөндеу жұмыстарын жүргізген.
Елге пайда тигізуді көздеп, осындай игі істермен айналысып жүрген кәсіпкерлердің алдағы жұмысына сәттілік тілеген өңір басшысы аталмыш ауылдағы мәдениет үйіне табан тіреп, көрмені аралады. Көрмені аралау барысында Теректі ауданына қарасты ауылдық округтер жайлы жалпы ақпараттар, олардың жетістіктері және жеке кәсіп иелері, ауыл шаруашылығы өкілдері атқарып жатқан жұмыстар жайлы біраз ақпарат берілді.
Сонымен қатар мәдениет үйінде «Ауылдық елді мекендердің тұрақты дамуының жолдары» тақырыбындағы семинар-кеңес өтті. Кеңесте агроөнеркәсіптік кешенді дамыту мақсатында жасалатын жұмыстар талқыланды.
Марлен Ғилымхан,
zhaikpress.kz
