Албаниядағы мыңдаған ауғандық босқындар АҚШ пен Канада визасын күтіп отыр, деп хабарлайды ҚазАқпарат Еuronews-ке сілтеме жасап.
Олар бес ай бұрын өткен жылдың тамыз айынан бері Ауғанстанды бақылауға алған Талибанның қудалауынан құтылу үшін туған жерінен қашып кеткен.
Өткен жылдың тамыз айында Албанияға 2400-ге жуық ауғандық келген. Олар Америка және Канада визасын күтіп, уақытша қалған. 300-ге жуық адам виза алып, ұшып кетуге мүмкіндік алды. Қалғандары күтіп отыр.
Алайда барлығына виза алуға кепілдік жоқ. АҚШ үкіметі ешқандай міндеттеме алмай отыр. Ресми түрде, өз Отанын тастап кеткен ауғандықтардың Албанияда тұруына 12 америкалық коммерциялық емес ұйым демеушілік жасап отыр.
Албания, Косово, Солтүстік Македония және Канада АҚШ үкіметінің талибтер билікке өткеннен кейін америкалықтар эвакуациялаған ауған босқындарына баспана беру туралы үндеуіне жауап берген елдердің қатарында болды.
