Қазақ күресінен БҚО чемпионаты өтті

Қазақ күресі соңғы жылдары облыс көлемінде қарқынды дамып келеді. Жаңақала ауданында да ауылдың балалары осы спорт түрімен қызығушылықпен айналысып, түрлі жарыстардан жүлде салып жүр. Жуырда спорт кешенінде 2007-2008 жылы туған жасөспірімдер арасында қазақ күресінен Батыс Қазақстан облысының чемпионаты жоғары деңгейде өтті.

277103353_3105692369649346_5991222973937788826_n

А кілемі және Б кілемі деп бөлінген бозкілімдер, жаттықтырушыларға арналған орындар, құрметті қонақтар жайғасатын жер, үлкен етіп шығарылған баннер бәрі-бәрі үйлесім тапқан. Қаумалаған көрермендер де жарыстың көркін келтіргені рас. Орал қаласы, Бөрлі, Тасқала, Бәйтерек, Сырым, Ақжайық, Теректі, Шыңғырлау, Бөкей ордасы, Жаңақала аудандарынан командалар қатысып, жасөспірім палуандар 10 салмақтан өз бақтарын сынады. Жарыстың ашылу салтанатына аудан әкімі Дархан Закарин, Батыс Қазақстан облысы Қазақ күресі ассоциациясының президенті Әсет Сұлтанұлы, Қазақ күресінен Батыс Қазақстан облысы ересектер құрамасының аға жаттықтырушысы Қайрат Салықұлы, Қазақ күресінен Батыс Қазақстан облысы жасөспірімдер құрамасының аға жаттықтырушысы Арман Келмұханов, аудандық балалар-жасөспірімдер спорт мектебінің директоры Жайсаң Есекенов, аудандық тілдерді дамыту, аудандық мәдениет, тілдерді дамыту, денешынықтыру және спорт бөлімінің басшысы Талғат Жанболатұлы және жаттықтырушылар мен көрермендер қатысты.

Алғаш боп сөз алған аудан басшысы Дархан Әмірханұлы жарысқа қатысушыларға сәттілік тілеп, мерекемен құттықтады.

Одан әрі Батыс Қазақстан облысы Қазақ күресі ассоциациясының президенті Әсет Сұлтанұлы сөз сөйлеп, қазақ күресін қолдап, дамытуға үлес қосқан аудан әкімі Дархан Әмірханұлына, аудандық балалар жасөспірімдер спорт мектебінің директоры Жайсан Ахметұлына және Айдархан жалпы орта білім беретін мектебінің директоры Жанаргүл Қуанқызына алғысхат табыс етті.

277005741_3105691646316085_8235445216920438734_n

- Жарысты өткізудің жауапкершілігі өте үлкен. Жоғары деңгейде өтуіне бар күш-жігерімізді салдық. Осы орайда Бірлік асыл тұқымды мал зауытының директоры Қанат Ешимовке, Хафиз шаруа қожалығының жетекшісі Бекболат Жағыпаровқа, "Айдар" шаруа қожалығының жетекшісі Айдар Гафуұлына, ауданымыздың жас кәсіпкері Берген Серікұлына алғысымды білдіремін. Палуандар екі кілемде күресуде. Көрермендердің де қолдауы жақсы. «Бақ шаба ма, бап шаба ма?» оны бірге көреміз, - деді Ж.Есекенов.

Өзім мектеп кезінде қазақ күресімен айналысқандықтан, жарысты бастан-аяқ толықтай тамашаладым. Тартысқа толы тамаша белдесулерге куә болдық. «Әттеген-ай» деген сәттер де аз болмады. Финалдық белдесуге жолдама алған 4 бірдей палуанымыз да үмітті ақтамады. Бірінен соң бірі ұтылды. Әсіресе жерлестеріміз Мақсат Мұратқали, Мирас Қуанышқалиев, Асылбек Елеубай есімді жас палуандардан алтын күткені жасырын емес. Жарыстың өз жеріңде өтуі екі есе күш беріп, көрерменнің қолдауы одан сайын жеңіске деген құлшынысыңды арттыруы керек емес пе? Біздің палуандарымыздан оны байқай алмадым. Көздерінде от жоқ. Жаттығулары да кемшін түсті ме, кім біледі? Алдағы күннен үміт үзбейміз. Кеткен кемшіліктер мен олқылықтардың орны толып, ауданымыздан жас чемпиондар шығарына сенеміз.

Жанайдар Болшатбекұлы,

Жаңақала ауданы

zhaikpress.kz

Жарыс нәтижесі:

38 кг.

1 орын - Бекзат Қабеш (Сырым ауданы)

2 орын - Мақсат Мұратқали (Жаңақала ауданы)

3 орын - Армат Бекмурзин (Тасқала ауданы)

3 орын - Мәди Ғарифуллин (Теректі ауданы)

42 кг.

1 орын - Талғат Аманқос (Сырым ауданы)

2 орын - Мирас Қуанышқалиев (Жаңақала ауданы)