«Тазалық – табалдырықтан басталады» демекші, қоршаған ортаның тазалығына жауапкершілікпен қарау - әрбір азаматтың басты міндеті. Жуырда тазалықты жанына серік еткен тасқалалықтар ауданның көркеюіне және көгалдануына септігін тигізетін сенбілік шарасына белсене араласты.
«Аудан көлемінде жүргізіліп жатқан тазалық жұмыстарына барлық мекеме қызметкерлері бір кісідей атсалысып, әрбір ұжым бөлінген аумақтар мен көшелерге тазалық жұмыстарын қарқынды жүргізді. Жалпы аудан бойынша 52 мекеме, 178 адам жұмылдырылған. 24 текше метр қоқыс шығарылды. Және бір "КамАЗ" автокөлігі мен бір трактор тіркемесімен қоқыс шығарылды»,- дейді Тасқала ауылдық округі әкімінің орынбасары Қуаныш Қабдолда.
«Міне, бүгін ауылымызда сенбілік өтті. Әрине, тасқаламыздың көркеюіне керек нәрсе. Жалпы көшелер тазарып, санитарлық жағынан да тазаланып қалды. Мекемелерге көшелерді бөліп бергені дұрыс болды. Бұл - ауылдық әкімдіктің жақсы ісі. Барлығы дерлік ауданымызды көркейтуге өз үлестерін қосты», - деді ауыл тұрғыны Берік Даутов.
«Көктем келіп жердің беті кеуіп, оның үстіне қоқыстар шыға бастады. Жетінші сәуір күні ұжымдарға бөліп берілген көшелерді тазаладық. Енді осылай сенбіліктер ұйымдастырылып тұрады. Әріптестерімізбен бірігіп, берілген көшені тазалап шықтық. Бұл да тәрбиенің бір түрі деп ойлаймын»,- дейді ауыл тұрғыны Гүлім Мукашева
Гүлмира Мақанова,
Тасқала ауданы,
zhaikpress.kz
