Зульфия Чиншалло Қазақстан чемпионатында 4 рекорд жаңартты

Токио Олимпиадасының қола жүлдегері Зульфия Чиншалло Қызылорда қаласында ерлер мен әйелдер арасында өтіп жатқан ел чемпионатында төрт рекордты жаңартты, деп хабарлайды ҚазАқпарат тілшісі.

Қазақстан ауыр атлетика федерациясы мәлім еткеніндей, Зульфия 59 келіге дейінгі салмақта үздік шықты. Ол қоссайыс қорытындысында 223 келіні (95+128) көтерді.

Екінші орынға ие болған қарсыласын 51 келіге артқа қалдырған З.Чиншалло Қазақстанның төрт рекордына (жұлқа көтеруден екі, серпе көтеруден бір және қоссайыс қорытындысында) қол жеткізді.

Сонымен қатар қазақстандық ауыр атлетке Ашхабад қаласында 2018 жылы өткен әлем чемпионатының қола жүлдесі де табыс етілді. Бұл біріншілікте Зульфия бесінші орынға табан тіреген еді. Әйтсе де оның алдындағы екі спортшының нәтижелері жоққа шығарылғандықтан, З.Чиншанло үздік үштікке іліккен еді.

З.Чиншалло ел біріншілігіне тыңғылықты дайындалғанын, сондай-ақ әлем чемпионатының жүлдесін алғанына қуанышты екендігін, бұдан былай да тынбай еңбектене беретінін жеткізді.

Зульфия Чиншаллоны осынау табысымен Илья Ильин Инстаграмдағы парақшасында құттықтады.

«Бүгін Зульфия Чиншалло серпе көтеруден 128 кг олимпиада рекордына қол жеткізді. Жалпы нәтиже – 223 кг және әлемдік рейтингте 1-орынға көтеріледі. Саған өзіңнің бесінші олимпиадаңа барып, алтын алуыңа тілектеспін», деп жазды И.Ильин.

Қазақстан чемпионатындағы алғашқы екі күннің нәтижелері мынадай:

Әйелдер. 45 келі

1. Александра Беленко (59+76) – ШҚО

2. Айнұр Әбдіхалықова (59+72) – Жамбыл облысы

3. Альфия Гарифуллина (57+73) – Алматы облысы

49 келі

1. Дарья Балабанюк (70+83) – Қарағанды облысы

2. Айым Мұхаметжанова (60+75) – Ақмола облысы

3. Салтанат Қыпшақбай (48+59) – Қызылорда облысы

55 келі

1. Айгерім Ауылбек (76+94) Алматы обл.

2. Шынар Жапар (73+86) Жамбыл обл.