Бөрлілік балғындар жазғы демалысты мәнді өткізуде. Бірі мектеп жанындағы лагерьлерде демалса, енді бірі еліміздің түкпір түкпіріндегі сауықтыру шипажайларында денсаулықтарын түзеп, тағы бірі ата-анасына көмектесіп, еңбекпен шыңдалуда. Ал, ең қызықты лагерь Бумакөл ауылындағы Жас туристтер станциясы ұйымдастырып жатқан «Қарашығанақ» шатырлы лагерінде өтуде.
Балалардың жазғы демалысын ұтымды ұйымдастыру аталған лагерде жақсы жолға қойылған. Қызықты ойындар, спорттық жарыстар, мәдени шаралар мен дәмді әрі пайдалы тағамдар, жасөспірімдердің қызығушылығын арттыратын үйірмелер де жұмыс жасауда.
Жалпы станция ұйымдастырған лагерде биылғы ерекшелігі аудандық балалар мен жасөспірімдер спорт мектебінің шәкірттеріде үш күндік демалыста болуы. Бұл биылғы «Балалар жылы» аясында өткен керемет шара.
- Былтыр елдегі карантиндік шараларға байланысты жазғы лагерь «Жеңімпаздар лагері» деп аталып, өзіміздің спорт мектебінің жанында өткен еді. Түрлі шаралар өткізіліп, Орал қаласына сапарға шықтық. Көңілді сөре, түрлі спорттық жарыстарда өтті. Енді биыл мектебіміздің 20 оқушысы Бумакөл ауылында қызықты күндер өткізді. Мұндағы мақсат - балалардың жазғы демалысын тиімді және денсаулыққа пайдалы етіп өткізу және салауатты өмір салтын насихаттау болып отыр. Жұмыс жоспарына сәйкес барлық шаралар ұйымдастырылды. Күн тәртібінде белгіленгендей балалар 5 мезгіл тамақпен қамтылды. Әр күнді көңілді және тиімді пайдалану мақтасында балалармен өткен спорттық іс шаралар: футбол, волейбол, лабиринт қашықтығы, өткелдер қашықтығы, суға шомылу, көңілді эстафеталар ойындары өткізілді, - дейді БЖСМ директоры Есенаман Стамғазиев.
Топтасып бөлінген белсенді командалар БЖСМ-нің тиісті дәрежелі дипломдарымен марапатталды. Ауданның жас спортшылары және олардың ата-аналары Бөрлі ауданының білім беру бөлімінің Жас туристер станциясы ұжымына алғыстарын білдіруде.
"Демалушы балалардың ақыл-ой, сана-сезімін жетілдіру бойынша да түрлі әдеби-сазды кештер, мәдени іс-шаралар, танымдық ойындар, байқаулар мен сайыстар өткізіледі. Бұдан бөлек, балалардың бойын сергіту үшін таза ауада арнайы серуендер ұйымдастырылады. Қала мен ауыл мектептерінің оқушыларын қамтитын бұл патриоттық лагерь өскелең ұрпақтың бос уақытын тиімді пайдаланып, Отанын, жерін сүйер азамат болып қалыптасуына ықпалы зор"- дейді ұйымдастырушылар.
Бөрлі ауданы,
zhaikpress.kz
