Сербия мемлекетінде жасөспірімдер арасында VI рет ұйымдастырылған «Ұлттық кубок» атты халықаралық боксшылар сайысында 63 келі салмақ дәрежесінде оралдық спортшы Өнер Сейілхан жеңімпаз атанды.
Аталмыш турнирге Қазақ-станның атынан 11 спортшы қатысып, отандастарымыз командалық есепте бірінші орынды иеленді. Ел абыройын асқақтатқан Айдостың Өнері Теректі ауданының Подстепный ауылында өмірге келген. Бокспен 5-сыныптан бастап айналысатын ол Оралдағы облыстық мамандандырылған олимпиада резерві балалар мен жасөспірімдер мектебінде жаттығады. Бұған дейін ол бокстан жас-өспірімдер арасындағы ел біріншілігінде бақ сынап, екі рет чемпион атанған.
Өнердің бапкері Ержан Киндихов осы шәкіртінен зор үміт күтетінін айтты.
– Осы жеңіс – жанкешті жаттығулардың бір жемісі. Жарыс барысында үш жекпе-жекке шығып, қарсыластарының бәрін 5-0 есебімен жеңді. Алдағы уақытта да Өнердің биік белестерді бағындыратынына сенемін, – деді Ержан Ижанұлы.
Айта кетейік, Өнердің ағасы Әмір Сейілхан да бокспен айналысады. Көптеген жарыстарда жеңімпаз атанып жүрген Әмір биыл Кувейтте өткен халықаралық бәсекеде үшінші орынды иеленді.
Аманжол Исламғали,
zhaikpress.kz
