Бүгін Орал қаласындағы «Атамекен» өнер ордасында «WESTKAZINVEST-2022» халықаралық инвестициялық форумы өтті. Оффлайн және онлайн сипатта ұйымдастырылған іс-шараға 10 елден 500-ден астам адам және 200-ден артық компания қатысты.
Форум облыстың инвестициялық әлеуетімен және мүмкіндіктерімен, инвестициялық жобалармен таныстыруды, алыс-жақын елдермен сауда-экономикалық байланыс орнатуды, өңіраралық ынтымақтастықты нығайтуды мақсат етті.
– Форумға 10 елдің әлеуеті жоғары инвесторлары қатысуда. Нақты инвестиция жасаймын деген компаниялардың басшылары келді. Португалия, Израиль, Түркия елдері мен Ресей Федерациясының тауар өндірушілері жобаларымен таныстырды. Мемлекет басшысы Қасым-Жомарт Кемелұлы Тоқаев геосаяси ахуалды пайдалана отырып, Қазақстанда шетелдік компаниялардың релокациясына жағдай жасауға тапсырма берген еді. Бүгінгі форумды осы бағыттағы нақты қадамдарымыздың бір белгісі деп айтуға болады. Бірнеше елдің инвесторларының басын қосқан іс-шара жоғары нәтижелерге қол жеткізуге жол ашады деп ойлаймын, – деді форумның пленарлық сессиясын ашқан облыс әкімі Ғали Есқалиев.
Өңір басшысы алыс-жақын шетелдерден келген қонақтарға, кәсіпорын, компания басшыларына алғысын білдірді.
Форум аясында облысымыздың және Ресей Федерациясының шекаралас облыстарының тауар өндірушілерінің көрмесі ұйымдастырылды.
Өңір басшысы бастаған қонақтар бизнес өкілдерінің өнімдерімен танысты. Сондай-ақ мұнай-газ секторына, агроөнеркәсіптік кешенге және ІТ-технологияларға инвестиция тарту бойынша панельдік сессиялар өтті. Іс-шара жөнінде толығырақ газеттің келесі санынан оқи алсыздар.
Ясипа Рабаева,
zhaikpress.kz
