Бүгін Тәуелсіздік мерекесіне орай облыстық орталық мешітте өңір тұрғындарынан жиналған жамағат үшін ҚМДБ-ның БҚО-дағы бас имамы Бақытжан Құралбайұлы Желтоқсан құрбандарын еске алып, олардың рухына арнап құран-хатым жасалды.
Құран бағыштау рәсіміне қатысқан Батыс Қазақстан облысының әкімі Нариман Төреғалиев Желтоқсан оқиғасының қатысушыларымен сұхбаттасып, Желтоқсан құрбандарының рухына бағышталған құраннан соң дұға етті.
- Бүгін күннің қандай қасиетті күн екені баршамызға белгілі. Тәуелсіздік біздің қолымызға оңай тиген жоқ. Осындай қасиетті мереке күні баршамызға айтарым аман болайық, еліміз тыныш болсын. Елдің амандығы, тыныштығы бәрімізге ортақ, бәрімізге керек. Бір елдің баласындай бір жағадан бас, бір жеңнен қол шығарып бірлігімізді нығайтайық. Алдымызда мемлекет басшысы қойған үлкен мақсат-міндеттер тұр. Оны орындап шығу үшін бізге ауызбіршілік, тыныштық, береке қажет. Барлығыңызға мереке құтты болсын, отбасыларыңыз аман болсын, тума-туыс, жақындарыңыз аман болсын деймін. Ауру-сырқаттан, өткен пандемия сияқты індеттен аман болайық. Жақсы күндерде жақсы ортада аман-есен жүздесейік, - деп өзінің жүрекжарды құттықтау тілегін білдірді өңір басшысы Нариман Төреғалиев.
Еске сала кетейік, кешкі сағат 18.00-де облыстық орталық мешітте Желтоқсан құрбандарының рухына бағышталған ас беріледі.
Альфия Шамаева
zhaikpress.kz
