Әзірбайжан Республикасында «Түркі әлемінен – Шушаға, Шушадан – түркі әлеміне» атты халықаралық мәдени іс-шара өтуде. Түркі мемлекеттерінің әдебиет пен мәдениет, руханият және өнер саласының өкілдері бас қосқан үш күндік іс-шара Әзірбайжан Республикасының астанасы Бакуде бастау алды.
26 қаңтар күні басталған іс-шара ертең түрлі кездесулерге ұласады. Жиын барысында Әзірбайжан және өзге де түркі мемлекеттерінің мәдени орталықтары мен Қадыр орталығының арасында тығыз байланыс орнату мәселелері егжей-тегжейлі талқыланып, жоспарлануда.
Шараға қатысушыларды халықаралық түркі мәдениеті мен мұрасы қорының президенті Гюнай Эфендиева қабылдап, қонақтарға естелік кітаптар мен сыйлықтар тарту етті.
Қадыр Мырза Әлі атындағы мәдениет және өнер орталығы мен Қазақстан Жазушылар Одағы БҚО филиалының директоры Бауыржан Халиолла сөз алып, өз ойын ортаға салды.
Дүниежүзі жас түркі жазушылар одағының төрағасы Интипаж Яшаның бастамасымен ұйымдастырылған іс-шараға қатысушылар арасында Қазақстандық жас жазушы, аудармашы Еркінбек Серікбай, Қырғыз Республикасындағы «Манас» театрының директоры Азиз Биймырза, Өзбекстан Жастар істері агенттігі басшысының орынбасары, ақын Мехриназа Аббас, өзбекстандық жазушы-публицист Дилрабо Норкулова, «Әдәбияты вақфи» атты түрік басылымының редакторы Энвер Айкөл бар.
Марлен Ғилымхан,
Қадыр Мырза Әлі атындағы
мәдениет және өнер орталығы
ақпарат бөлімінің басшысы
