Дүниежүзілік тарихқа көз салсақ әділетті де әділетсіз соғыстар аз болған жоқ.
Соның ішінде 34 жыл бұрын Ауғанстанда болған соғыс кезінде Кеңес Үкіметінің шешімімен шет елде жүргізіліп жатқан соғысқа одақтас республикалардың талай боздақтары аттанып, небір зұлматты бастан кешкені белгілі. Сол соғысқа біздің ауданымыздан да талай жастар кетіп, туған жеріне аман-сау оралмай қалғандары да көп.
Осы боздақтарды қастерлеу, бүгінгі ұрпаққа олардың ерлігін паш ету мақсатында Шыңғырлау колледжінде «Ауғанстан ақиқаты» атты үлкен шара өтті.
Ауғандық жауынгерлер Қабас Ақбалиев, Нариман Асқаров, Мұхтар Даулетқалиев қатысқан жиын соғыста қайтқан жауынгерлерді бір минут үнсіздікпен еске алудан басталды.
Колледж директоры Серікбай Жұмағұлов шараға келген жерлестерімізді айтулы күнмен құттықтап, бұл қасиетті күн бүгінгі ұрпақ қастерлеп, мәнін терең ұғыну үшін осындай кездесулердің маңызы жоғары екендігіне тоқталды.
Өз кезектерінде интернационалист жауынгерлер студенттердің қойған сұрақтарына жауаптар қайтарып, соғыс даласында жерлестеріміз жасаған ерліктерді еске түсіріп, өздерінің бастан өткерген оқиғаларымен бөлісті.
