Бүгін Қадыр Мырза Әлі атындағы мәдениет және өнер орталығында заңгер, «Құрмет» орденінің иегері, Қазақстан Республикасы Парламенті Мәжілісінің депутаттығына кандидат Абзал Құспанмен кездесу өтті.
Ең әуелі экраннан кәсіби заңгердің өміріне, еңбек жолына қатысты бейнебаян көрсетілді. Қадыр Мырза Әлі атындағы мәдениет және өнер орталығының директоры Бауыржан Халиолла Абзал Темірғалиұлының бүгінге дейін атқарған жұмыстарына тоқталып, оның қолынан іс келетін азамат екенін жеткізді. Өз кезегінде мәдениет, спорт және ақпарат қызметкерлерінің кәсіптік одағы БҚО филиалының төрағасы, еңбек ардагері Айдар Батырханов заңгердің алдағы уақытта жүзеге асыратын жоба-жоспарларына сәттілік тіледі.
Ақын, «Парасат» орденінің иегері Дариға Мұштанова, М. Өтемісов атындағы Батыс Қазақстан университетінің профессоры, филология ғылымдарының кандидаты Зейнолла Мүтиев, ақын, актер Қуаныш Амандық, кәсіпкер Тұрарбек Тілемісов және кездесудің басқа да қонақтары өз ойларын ортаға салып, еліміздің әлеуметтік-экономикалық хәл-ахуалын жақсарту бағытындағы мәселелерді талқылады. Оған қоса заң шығарушы құрылымда заңгердің қызмет етуі тиіс екенін айтты.
Кездесу барысында Абзал Құспан қолданыстағы заңнамаларды жетілдіріп, әділетсіз сот актілерін қайта қарау керектігін және Парламенттің құзыретін арттырып, ел ішіндегі экологиялық ахуалды оңалту қажет екенін тілге тиек етті.
Марлен Ғилымхан,
zhaikpress.kz
