Enbek.kz электронды еңбек биржасы алаңында тау-кен өндіру және өңдеу өнеркәсібі кәсіпорындарының бос жұмыс орындарының республикалық онлайн-жәрмеңкесі басталды. Бұл туралы ҚР Еңбек және халықты әлеуметтік қорғау министрлігі хабарлады.
Жәрмеңкеге еліміздің түрлі өңірлерінен «Алматы ауыр машина жасау зауыты» АҚ, «KSP Steel» ЖШС, «Ремстройтехника» АҚ, «KAZ Minerals Aktogay» ЖШС және басқа да 20-дан астам ірі жұмыс беруші қатысады. Жәрмеңкеде түрлі мамандық бойынша 680-нен астам бос жұмыс орны ұсынылады.
Жәрмеңке барысында жұмыс берушілер өз компанияларының онлайн-таныстырылымын өткізеді. Қолда бар бос жұмыс орындарын ұсынады және ең қолайлы кандидаттардың жеке базасын қалыптастырады. Өтініш берушілер өз кезегінде ұйымдардың HR-менеджерлерімен сөйлесе алады, әңгімелесуден өтіп, оларға қызықтырған сұрақтарын қоя алады, сондай-ақ «Сынақ мерзімін қалай сәтті өтуге болады» және «Жұмысқа басқа үміткерлерден қалай ерекшеленуге болады» вебинарларына қатыса алады.
Іс-шараға қатысу үшін ЭЕБ порталындағы Tanda.Enbek арнайы бөліміне кіру керек, онда жұмыс іздеушілер жұмыс берушілер туралы қысқаша ақпаратпен танысып, қолжетімді бос жұмыс орындарын қарап, оларға жауап бере алады.
Жәрмеңкені өткізу барысын ҚР Еңбек және халықты әлеуметтік қорғау министрлігінің ресми Youtube-каналынан көруге болады.
Шара Астана уақыты бойынша сағат 18.00-ге дейін жалғасады.
