28 сәуір мен 9 мамыр аралығында Орал қаласында түрлі мәдени-танымдық, спорттық іс-шаралар, кітап және қолөнер көрмелері, тәрбие сағаттары, патриоттық акциялар, ардагерлермен кездесу кештері, ескерткіштерге гүл шоқтарын қою рәсімдері және ауыл шаруашылық өнімдерінің жәрмеңкесі өтеді. Бұл туралы Орал қаласы әкімдігінің баспасөз қызметі хабарлады.
29-30 сәуір және 6-7 мамыр күндері Ықсанов көшесінде және Жәңгір хан көшесі, 31/2 мекенжайында ауыл шаруашылық өнімдерінің жәрмеңкесі ұйымдастырылады.
1 мамыр сағат 11.00-де Қазақстан халқының бірлігі күніне орай Абай алаңында театрландырылған мерекелік концерт өтеді.
Сонымен қатар Арбат бойында этномәдени бірлестіктердің қолөнер көрмесі ұйымдастырылады.
Мерекеге орай 1 мамыр күні сағат 15.00-де велошеру, сағат 17.00-де қалалық мәдениет және демалыс саябағының маусымдық ашылуына орай концерт өтеді.
5 мамыр күні сағат 18.00-де Жастар мәдениет сарайында Вокалды аспаптар ансамблінің шығармашылық концерті өтеді.
6 мамыр күні сағат 10.00-де «Жеңіс» алаңында жас сарбаздардың патриоттық шеруі, 12.00-де «Атамекен» өнер ордасында Отан қорғаушылар күніне орай «Ел қорғаны» атты концерт өтеді.
Ал 7 мамыр күні сағат 09.00-де Отан қорғаушылар күніне орай көпшілік жүгіріс, 10.00-де «Ұранды елдің ұрпағы қайсар» атты ат жарысы ұйымдастырылады.
Д.Нұрпейісова атындағы скверде 7 мамыр күні сағат 11.00-де Тәжік-ауған шекарасында қаза тапқандарға арналған ескерткіш ашылады.
9 мамыр күні сағат 8.00-9.00 аралығында гүл шоқтарын қою рәсімі өткізіледі.
Нақтырақ айтсақ, «Батыр қыздар» ескерткішіне, Г.К.Жуковтың ескерткішіне, «Бауырластар» зиратына, «Ол күндердің даңқы өшпейді» монументі, Т.Масин ескерткішіне гүл шоқтары қойылады.
Ал 10.00-ден бастап «Жеңіс» алаңындағы «Мәңгілік алауға» гүл шоқтарын қою рәсімі өтеді.
9 мамыр күні сағат 12.00-де қалалық мәдениет және демалыс саябағында мерекелік концерт және солдат ботқасы ұйымдастырылады.
Ұлы Жеңіс күніне орай, дәл осы күні кешкі сағат 19.00-де Қадыр Мырза Әлі атындағы амфитеатрда мерекелік концерт өтеді.
