Дәл қазір 31 мамыр – Саяси қуғын-сүргін және ашаршылық құрбандырын еске алу күніне орай «Батыс Қазақстандағы саяси қуғын-сүргін саясатының нәтижелері: тарих пен тұлға» атты дөңгелек үстел өтуде. Жиынға БҚО әкімі Нариман Төреғалиев қатысуда.
Жиынды саяси қуғын-сүргін құрбандарын ақтау жөніндегі облыстық комиссияның төрағасы Жантас Сафуллин ашты.
«Саяси қуғын-сүргін құрбандарын толық ақтау жөніндегі Президенттің Жарлығын орындау мақсатында 2020 жылдан бастап арнайы жұмыс тобы қызмет етіп жатыр. Біз бүгін 2022 жылы жарық көрген 7 кітаптың таныстырылымын өткіземіз. Бұл кітаптардың үшеуі монографиялық еңбек, екеуі архив құжаттарына арналған, екеуі анықтамалық. Саяси қуғын-сүргін құрбандарын ақтауда қиындық жоқ, қазір Президент жарлығына сәйкес барлық архив құжатары қолжетімді, - деп атап өтті ол.
Дөңгелек үстелге өлкетанушылар, тарихшылар және жоғарыда аталған жеті кітаптың авторлары қатысуда.
БҚО әкімі Нариман Төреғалиев: «Егер бүкіл кеңес халқы үшін 1937-38 жылдардағы куғын-сүргін «үлкен террор» жылдары зор қайғы болса, онда біздің еліміз үшін бұрын-соңды болмаған қасірет болды. Дәл осы жылдары большевиктік-сталиндік режим алдын-ала әзірлеген саясатының нәтижесінде қазақ халқының саны едәуір кеміді.
Бұл орайда, өңірлік комиссияларды құрудың негізгі мақсаты – Мемлекет Басшысының Жарлығы аясында ұсыныстар әзірлеу үшін осы уақытқа дейін құпия болып келген немесе әлі белгісіз, ұмытылған деректерді, фактілерді табу, жинау, репрессияның түрлері мен механизмдерін анықтау, ауылдардағы қуғын - сүргін орталықтары мен орындарын, құрбандардың санын, аты-жөнін анықтау және зардап шеккендер туралы осы мәселеге қатысты басқа да ақпарат жинау, талдап- сараптау болатын. Саяси қуғын-сүргін құрбандарын ақтау жұмысын мемлекеттік тұрғыдан зерттеп, талқылап және жаңаша тарихи баға беру - бүгінгі ұрпаққа, бізге жүктелген ауқымды міндет», - деді.
Аймақ басшысы өз сөзінде комиссияның жұмысы үшін облыс бюджетінен қаржылай қолдау білдіріліп келгенін, алдағы уақытта да қолдау болатынын жеткізді.
Жанат Көшкінбай,
Фото авторы: Эльвира Меңдіғали
zhaikpress.kz
