Казталов ауданында қысқа мал азығын дайындау науқаны басталды. Жасыл шалғынға орақ салған ағайындар көп. Солардың қатарында Болашақ ауылдық округіндегі «Жан-нар» шаруа қожалығы мен «Дауымшар» ауыл шаруашылық өндірістік кооперативі.
Аталмыш кәсіпорын қызметкерлері қырлық шабындыққа орақ салып, шөп шауып, буып жатыр. Кәсіпорын жетекшісі Дарын Ашимовтың айтуынша, биыл Болашақ ауылдық округінде биыл шөптің шығымы жаман емес. Әр гектарынан 5-6 центнерден өнім алуға болады.
Биыл ауданымызда шөптің шығымы әр округте әр түрлі. Су мол шыққан Жалпақал өңірінде көлдіктер мен жайылмаларда шөп шығымы мол болса, Казталов, Бірік, Бостандық, Қошанкөл, Тереңкөл ауылдық округтерінде төмен.
«Елде болса ерінге тиеді» демекші, қысқа әзірлік жақсы болса, елдің де жағдайы жақсы болмақ.
Нұр Рахман,
Казталов ауданы
zhaikpress.kz
