Жер бетiндегi мұсылмандар үшiн қуанышқа толы мейрам – қасиеттi Құрбан айт мерекесiнiң алғашқы күнiнде Теректі аудандық мешiтіне жиылғандардың қарасы көп болды.
Аудандық мешiттiң бас имамы Еркiнбек Ебелекқажиев жамағатқа Құрбан айт, бiрлiк-береке жайында уағыз айтып, құрбандық шалудың үкiмi, шарттары және орындалу тәртiбiмен таныстырды.
Содан соң аудан әкiмi Әлия Мұханбетжанова теректіліктерді Құрбан айтпен құттықтап, әр отбасына бақыт пен еліміздің амандығын тіледі.
Айт намазы оқылып болған соң, жамағат арнайы жайылған дастарханнан дәм татып, құрбан шалуға кірісті. Жастар жағы аудандық мешіт пен «Бірлік» қоғамдық бірлестігі ұйымдастырған ұлттық ойындардан сайысқа қатысып, бақ сынады. Жеңімпаздар диплом және бағалы сыйлықтармен марапатталды.
Естеріңізге сала кетсек, биыл да елімізде құрбан шалу рәсімі оффлайн және онлайн форматта өтеді. Ел азаматтарына, әсіресе, қала тұрғындарына қолайлы жағдай жасау мақсатында бұл рәсімді қашықтан өткізуге арналған qurban2023.kz сайты іске қосылды.
Аягөз Айтқалиева,
Теректі ауданы
zhaikpress.kz
