Бүгін қасиетті «Құрбан айт» мерекесіне орай ауданымыздағы Казталов мұсылмандар мешіті мен Жалпақтал мұсылмандар мешітінде айт намазы оқылды. Сонымен қатар, мұсылмандардың қасиетті мерекесінде құран бағышталып, жамағат атынан құрбан шалынды. Мешіттерде имамдар «Құрбан айттың артықшылығы» тақырыбында уағыз айтып, мерекені тойлау мәнерін түсіндіріп, халықты бірлікке шақырды.
Мерекеге орай бүгін аудан орталығында «Құрбан айт – ел ынтымағының ұйытқысы» атты мерекелік концерт өткізу, Жалпақтал ауылында қайырымдылық шараларын және мешіт жамағаты арасында ұлттық спорт түрлерінен жарыс ұйымдастыру жоспарланған. Үш күндік мерекенің екінші күнінде, яғни 29 маусымда аудан орталығында ұлттық спорт түрлерінен жарыс және «Серпін» алаңында шағын футболдан мешіт жамағаты арасында турнир ұйымдастырылады.
Асылбек Нәсіпқали,
Казталов ауданы
zhaikpress.kz
