"Ақжайық" – "Жеңіс" матчынан кейін достарымен бірге қалып, стадион ішіндегі қоқысты тазалап шыққан Әлихан есіңізде болар?
Облыстағы барлық БАҚ пен түрлі пабликтерге жарияланып, республикалық сайттар мен спорт блогерлерінің назарына іліккен Әлихан мен оның достарының игі ісі көпті таң-тамаша етті.
Оралдық жас футболшының әрекеті мәдениет және спорт министрі Асхат Ораловты да бей-жай қалдырмапты.
Әлихан мен оның достарына разы болған министр балақайларға арнайы алғыс хат жолдап, ризашылығын білдірді.
Көпке үлгі болған Әлихан мен оның достарына жолданған министрдің сый-сыяпатты облыстық дене шынықтыру және спорт басқармасының басшысы Қаймен Есендияров тарту етті. Кездесуге стадионды жинаған балақайлар мен олардың ата-аналары, "Жайық жастары" футбол командасының бапкерлері келді.
- Құрметті Әлихан, сенің көпшілікке үлгі боларлық үлкен іс-әрекетіңе – стадиондағы тазалыққа зор жауапкершілік танытқан еңбегіңе ерекше риза болдым. Футболдың дамуы жанкүйердің мәдениетіне де тікелей байkанысты. Сенің айналамызды таза ұстауға шақырған қадамың отандық футбол жанкүйерлері үшін маңызды. Өкінішке орай бүгінде кей азаматтар әлеуметтік желіде арзан атаққа еріп, абыройсыз іс-әрекетке барып жатқанын көреміз. Бұл ретте сенің және достарыңның жасағаны – ел құптарлық еңбек, дұрыс тәрбиенің нәтижесі. Сенің және достарыңның әрекеті барлығымыз үшін үлгі. Трибунада шашылған қоқысты жинаудан басталған игілікті әрекетің қоғамның дамуына маңызды үлес қосады, өзгелерді тазалыққа шақырады, ізгі қадамдарға жетелейді. Футболға, сүйікті клубыңа деген сүйіспеншілік саған осы спорт түрінде биіктерді бағындыруға, отандастарың мақтанарлықтай басқа да зор жетістікке жетелейтініне сенімдімін, - делінген министрдің хатында.
Хаттан бөлек, Әлихан мен достарына Катарда өткен футболдан әлем чемпионатының добы, арнайы сыйлық және сөмке толы кітап тарту етілді.
Түгелбай Бисен,
zhaikpress.kz
