Қазақстан Республикасы Президентінің 2003 жылғы 15 қарашадағы Жарлығымен тамыз айының үшінші жексенбісі «Спорт күні» кәсіби мерекесі ретінде аталып өтіледі. Аталмыш мерекеге орай, 17 тамыз күні аудан әкімдігінің мәжіліс залында Казталов ауданы әкімі Асланбек Сарқұлов ардагер спортшылармен, аудандық балалар-жасөспірімдер спорт мектептерінің жаттықтырушылармен және «Айбын» спорт клубының нұсқаушыларымен салтанатты кездесу өткізді.
Салтанатты шара тізгінін ұстаған аудандық мәдениет, тілдерді дамыту, дене шынықтыру және спорт бөлімінің басшысы Берік Рахымғалиев аудандағы спорттың дамуы мен спортшылардың жеткен жетістіктеріне тоқталып, аудан көлеміндегі бұқаралық спортты дамыту бағытында жүзеге асырылып жатырған жұмыстарға тоқталды. Оның айтуынша бүгінде ауданымызда 33 спорт алаңы, 13 ірілі-ұсақты стритворк аут алаңдары бой көтерген және аудан тұрғындарының 39 пайызы тұрақты түрде спортпен шұғылданады екен.
Аудан көлемінде салаға қатысты атқарылған жұмыстар легін жалғастыру үшін сөз кезегі Казталов аудандық балалар-жасөспірімдер спорт мектебі директорының оқу ісі жөніндегі орынбасары Жанболат Нұрқашевқа, Казталов аудандық орталық балалар-жасөспірімдер спорт мектебі директорының оқу ісі жөніндегі орынбасары Еркебұлан Ераховқа берілді. Жыл басынан бері атқарылған жұмыстар мен шәкірттердің жеткен жетістіктері, ашылған спорт нысандары жайында баяндаған азаматтар, баяндама мәтініндегі ақпараттарды слайд арқылы да көпшілік назарына ұсынды. Өз кезегінде «Айбын» спорт клубының директоры Нүркен Ахметов те саладағы атқарылған жұмыстар жөніндегі баяндамасын жасады.
Баяндамалар тыңдалып, жасалған істердің мәліметіне қаныққан соң кезек ұсыныс-пікір және сұрақ-жауап форматына ауысып, кездесуге қатысушылар саланы дамытуға қатысты көкейдегі ой-пікірлері мен сауалдарын жолдады. Жолданған сұрақтар бойынша нақты жауаптар беріліп, ұсыныстар назарға алынды.
Салтанатты шарада аудан әкімі Асланбек Сарқұлов сөз алып, жиналған жұртшылықты кәсіби мерекелерімен құттықтады.
- Спорт пен мәдениет ауыл-аймақ атын көпке танытатын, аудан намысын алға қоятын маңызды сала. «Спорт – денсаулық кепілі» дейді дана халқымыз. Келер ұрпақтың дені сау, ақыл-санасы жетілген салауатты болуы үшін спортпен шұғылданудың мәні зор. Алдыңғы баяндамада көрсетілгендей салада жеткен жетістіктеріміз жетерлік, дегенмен мәселелер де жоқ емес. Атап айтсам, аудандық спорт мектептері тек аудан оқушыларының санаулы пайызын қамтып отыр. Біз спорт мектептерінен тәлім алатын балалар санын молайтуымыз керек және соған мүмкіндік жасауға ұмтылғанымыз жөн. Саладағы түйткілді мәселелерді бірлесе шешу үшін тоқсан сайын кездесу ұйымдастыру керек. Ол кездесулер міндетті түрде аудан орталығында емес, басқа округтерде ұйымдастырылса нұр үстіне нұр болады. Сол арқылы біз әр ауылдың спорттық әлеуетін бағамдай аламыз. Әр ауылда қажетті спорт түріне басымдық беріп, дамытуды қолға аламыз. Белгілі бір спорт түріне басымдық беруден ұтарымыз көп.
Саладағы тағы бір мәселе – көлік мәселесі. Аталған мәселені де әрдайым күн тәртібінен түсірмей, шешу жолын іздестіргеніміз дұрыс. Барлығын бірдей көлікпен қамту қазіргі уақытта мүмкін емес болғанымен, алдағы уақытта балаларды жарыстарға тасымалдайтын автокөліктің ауданға алынары анық. Ауылдар мен елді-мекендерде түлектер қолдауымен салынған спорт алаңдары жетерлік. Оларды күтіп ұстауды қамтамасыз ету үшін өз балансымызға алу керек. Аудандағы дарынды, спортқа деген бейімі ерекше балаларды арнайы мамандандырылған мектептерге жіберуіміз қажет. Сонда ғана олимпиададан алтын алып келетін келешек чемпиондарды тәрбиелей аламыз. Жалпы, аудан спортының аяқ алысы жаман емес. Жүйелі жұмыстар жоғары жеістіктерге жол ашады. Мереке құтты болсын, жеңісті күндеріміз көп болсын! – деді өз сөзінде аудан басшысы.
Салтанатты шарада 8 адамға облыстық дене шынықтыру және спорт басқармасының алғыс хаты және спорт ардагерлеріне, әдіскерлер мен оқушыларға, оқушылар командасына, спортқа қолдау көрсетіп жүрген кәсіпкер азаматтарға аудан әкімінің алғыс хаты табыс етілді.
Салтанаты шара соңы аудан өнерпаздарының орындауындағы «Қазақ спорты», «Чемпиондар» әндерімен аяқталды.
Жансая Жұмажанқызы,
Казталов ауданы
zhaikpress.kz
