Сайқын, Бисен, Мұратсай, Орда ауылдық округтері орталықтары тұрғындарымен кездесіп, биылғы бірінші жарты жылдықтың қорытындысы мен алдағы істер туралы есеп берген аудан әкімі Нұрлан Сағынтайұлы орын алған олқылықтарды да баяндап, оларды түзету жолдары хақында жиналғандарды ашық әңгімеге шақырды.
Округтерде оздырылған бұл кездесулерге аудан әкімінің орынбасары Р.М.Зұлқашев, аудандық мәслихат хатшысы Е.Қ.Таңатов және біраз аудандық мекеме басшылары мен мамандары қатысты.
Аудан орталығында өткен жиында аудандық мәслихат хатшысы Ерболат Таңатов, ауыл тұрғындары Мұтиғолла Әбілов, Нағира Жұманәлиева, Бақыт Қонаева, Әбухан Исәлиев, Серік Таңатовтар сөйлеп, бірі жауын-шашында Орал қаласына бару былай тұрсын, Сайқынның ішіне кіріп-шығудың мұң екеніне шағымданса, екіншілері кей ата-аналарға мектеп формасын алудың қиындығын сөз етті.
Бисендіктер де қымбатшылыққа алаңдаушылық білдірді. Ауылдық округ әкімі Сапар Саматов Сайқын мен Бисен ауылдарындағы дүкендерді салыстыра сөйлеп, шөп сатушылардан да бағаны түсіруді сұрады. Мектеп директоры Айгүл Шамшединова жаңа оқу жылына әзірлік, мектеп формасымен қамтылу жөніндегі мәліметтермен таныстырып, интернатқа күрделі жөндеу жүргізілсе, білім ұясы жанынан ашылған аудандық методикалық орталық ұстаздарын ынталандыру мақсатында айлық төленсе деген ұсыныс түсірді. Ал мұратсайлықтардың көңіліндегі ең түйткілді мәселе – бөгетке суды мол жинау. Хан Ордасы ауылында аудан әкімінен соң аудандық жергілікті полиция қызметінің басшысы Е.Ш.Жоралиев округтегі қоғамдық тәртіп жайын баяндап, мал ұрлығының тиылмай отырғанын, мал бағудың ұйымдастырылмайтынын жеткізді. Тұрғындар Төлеген Ғұбашев, Бисенбай Есқалиев, Тұрақ Жұмашев интернет жұмысын жандандыру, ауылдағы пошта байланысы бөлімшесіне банкомат орнату мәселелерін қозғады.
Жиында қойылған сұрақтарға аудандық білім бөлімінің басшысы Ержан Иманбаев, бас дәрігер Әділгерей Ғаббас, электр жүйесі мекемесінің инженері Мерлан Сақауов, аудандық жұмыспен қамту және әлеуметтік бағдарламалар бөлімінің бас маманы Ерболат Сержанов, тағы басқаларда түсінік берді.
Каримолла ҒАЙСИН
Бөкей ордасы ауданы
www.zhaikpress.kz
