Әріптесіміз, журналист, Қазақстан Жазушылар одағының мүшесі Ерболат Райсов 60 жасқа толды.
Мерейтойға орай әріптесімізді аудан әкімі қабылдап, құрмет көрсетті.
– Сіз ұзақ жылдан бері тілші ретінде қоғам тарапынан артылған маңызды жауапкершілікті абыроймен атқарып келесіз. Ауданымыздың әлеуметтік-экономикалық және қоғамдық-саяси дамуын ақпараттық тұрғыдан қамтамасыз ету ісіндегі еңбегіңіз өлшеусіз. Өңіріміздің татулығы мен тұрақтылығының, өрістеп-өрлеуінің қарқынын паш ететін журналистер қашанда құрметке лайық. Еңбек жолыңызда әріптестеріңіз cізді адал қызметкер, өмірден тоқығаны мол, өз ісіне деген сүйіспеншілігі жоғары, атқарып жүрген қызметіне зор жауапкершілікпен қарайтын, қай істі болмасын тыңғылықты орындайтын үлкен азаматтық қасиеттерге ие тұлға ретінде бағалап, құрмет тұтады. Ағалық асудан асып, ақсақалдық мерейлі кезеңге аяқ басқан cізге зор денсаулық, ұзақ ғұмыр тілеймін. Әрдайым жүзіңіз жарқын, мерейіңіз үстем болсын, - деп асқаралы 60 жасымен құттықтап, естелік сыйлық тарту етті.
Сонымен қатар «Жайық Пресс» ЖШС бас директоры Табылғали Сапаровтың құттықтау хаты мен сый-сияпатын табыстады.
Ерболат Мырзағұлұлы 1963 жылдың 18 қыркүйегінде Қаратөбе ауданының Аққозы ауылында дүниеге келген.
1970-1980 жылдары Мұхит атындағы Қаратөбе орта мектебінде, 1988-1990 жылдары Орал совхоз-техникумында оқып, агроном мамандығын алған.
1980 жылдан 2001 жылға дейін аудандағы түрлі мекемелерде сантехник-электрик, көлік жүргізуші, кадр бөлімінің маманы, есепші, агроном қызметтерін атқарған.
2001 жылдан бері аудандық «Қаратөбе өңірі» газеті редакциясында әдеби қызметкер, қатардағы тілші, аға тілші, бас редактордың орынбасары қызметтерін атқарып келеді.
Жиырма үш жылдан астам уақытын баспасөз саласына арнаған қаламгердің руханият саласындағы сөз өнерімен өрнектеген ой еңбегінің жемістері облыстық, республикалық басылым беттерінде жарияланып келеді.
Райымбек Абай,
Қаратөбе ауданы
zhaikpress.kz
