Қазақ әндерін корей тілінде шырқайтын Сон Вон Саб – Ақтөбе облысының Оңтүстік Кореядағы амбассадоры атанды.
Бұл туралы Ақтөбе облысы әкімдігінің баспасөз қызметі хабарлады.
«Visit Aktobe» туристік ақпараттық орталығы «Ақтөбе облысының туристік амбассадорлары» жобасын таныстырды. Облысымыздың алғашқы елшілерінің бірі – белгілі оңтүстіккорейлік музыкант, әнші, қазақ және корей тілдерінде ән орындаушы Song Won Sub.
Сон Вон Саб амбассадор ретінде Оңтүстік Корея тұрғындарын Ақтөбе облысының көрікті жерлері туралы хабардар етеді.
«Мені қазақ мәдениеті қатты қызықтырады. Оны мен өз отандастарыма барынша көбірек таныстырғым келеді», - деді Сон Вон Саб Ақтөбеде өткен тұсаукесер барысында.
«Visit Aktobe» орталығының басшысы Ерсайын Сиюнов атап өткендей, амбассадорлармен жұмыс тәжірибесі бүкіл әлемде кең таралған.
Бұл қалалардың туристік әлеуетін ілгерілету үшін жасалады.
Жоба аясында Ақтөбе облысының танымал мәдениет және өнер қайраткерлері, бизнесмендер, дәрігерлер, ғалымдар, спортшылар және Ақтөбе облысы мен шетелдердің басқа да қайраткерлері Ақтөбе облысының туристік амбассадорлары болады.
