Қаратөбе ауданындағы спорт клубының жанынан құрылған грепплинг клубтың ашылу салтанаты өтті. «QARATOBE ARLANY» атауымен ашылған грепплинг клубтың ашылуына аудан әкімі Қадыржан Сүйеуғалиев, спортшы жастар, ауыл тұрғындары қатысты.
Грепплинг – жекпе-жек өнеріндегі жақын жекпе-жек стилінің ағылшын тіліндегі анықтамасы. Ауырту және тұншықтыру әдістерін қолдануда ең аз шектеулер бар күрестің барлық түрінің тәсілін біріктіретін жекпе-жек спортының түрі.
Грепплинг клубтың ашылу салтанатында құттықтау сөз сөйлеген аудан әкімі Қадыржан Сүйеуғалиев, БҚО грепплинг күресі федерациясының төрағасы Алмаз Ихсанов жекпе-жек өнерінің жастарды шымырлыққа, салауатты өмір салтын ұстануға, қайсарлыққа, төзімділікке, бір-бірін құрметтеуге үйрететіндігін атап өтіп, спорт саласының дамуына, аудан жастарының жетістігі көп болуына тілектес екендігін жеткізді.
Одан соң грепплинг күресінен әлем чемпиондары Армат Қабдолов пен Азамат Меңғайыр грепплинг жекпе-жегінің әдіс-тәсілдері мен ережелерін жиналған жұртқа көрсетіп берді.
БҚО грепплинг күресі федерациясының төрағасы Алмаз Ихсановтың айтуынша, ауырту немесе тұншықтыру әдісін қолдана отырып жекпе-жекті ертерек аяқтауға ұмтылу грепллингтің басқа күрес түрлерінен айырмашылығының айрықша белгісі.
Ол жапондық джиу-джитсу күресінің еуропалық модификациясы болып саналады. Еркін күрес, грек-рим, дзюдо және самбо күрестерінен құрылған спорт түрі.
Серікбай Хасанов,
Қаратөбе ауданы
zhaikpress.kz
