Казталов ауданындағы С.Садықов атындағы Казталов аудандық мәдени-демалыс орталығында Кеңес әскерінің Ауғанстан жерінен шығарылғанына 35 жыл толуына орай «Борис Керімбаев. Паншер патшасы» деректі фильмі ауыл жастарының назарына ұсынылды.
Паншер шатқалы Ауған соғысы кезінде үлкен стратегиялық маңызы бар аймақ болды. «Тым болмағанда Паншерді 1 ай ұстап тұру керек!» деп шешкен КСРО-ның әскери қолбасшылары шатқалға ең таңдаулы, ержүрек Борис Керімбаевтың батальонын қалдырады. Оның ерлігі аңызға айналып, «Қара майор» деген лақап аты күллі аймаққа таралды.
Керімбаев әскери жекпе-жектің 26 түрін меңгерген. Оны қол астындағы жауынгерлеріне үйретіп, Ахмад Шах Масудпен шайқаста аз шығынға ұшырады. Жеңілісіне ызаланған моджахеттердің қолбасшысы кімде-кім Керімбаевтың басын алса 1 миллион сыйақы беретінін айтқан екен.
Қазақ батыры соғыстан кейін елге аман оралып, өз қызметін Алматы қаласында жалғастырды.
Гүлнұр Сәуірғалиқызы,
Казталов ауданы
zhaikpress.kz
