Жас ұрпақтың білімді һәм саналы болғаны келешектің кемелдігін көрсетеді. Бүгін партада зейінін ілімге қойып, сауатын ашып отырған әр оқушы ертең-ақ ел тізгінін ұстайтын уақытқа жетеді. Сол себепті ұрпақ бос болмауы тиіс. Жәнібек ауданында бос уақытында қашықтықтан өткізілетін облыстық, республикалық, халықаралық сайыстарға қатысып, жеңіс тұғырынан көрініп жүрген мектеп оқушыларының саны артуда.
Туған жердің атын әлемге танытып, республикада намысты абыроймен қорғап жүрген оларға қолдау көрсету – ел азаматтарына парыз. Осы орайда аудан әкімі Тимур Шиниязов білім саласына ерекше көңіл бөліп, бірқатар жұмыстарды қолға алды.
Жәнібек аудандық орталықтандырылған кітапханалар жүйесінің директоры Светлана Джукина мен орынбасары Жаннат Мұстафина №1 мектеп-лицейіне барып, лездемеге жиналған «По следам Золотого ключика или Я тоже путешествовал с Буратино» атты онлайн байқауға қатысқан елуге жуық оқушыны әртүрлі аталымдармен марапаттады. Оларды аталған байқауға дайындаған мұғалімдері де ескерусіз қалмай, алғысхат иеленді.
- Бұл байқауға ауданымыздың оқушылары белсене қатысты. Байқауда оқушыларды қызықтыратын аталымдар болды. Бір ғана №1мектеп-лицейінен елуге жуық оқушының қатысуы үлкен нәтиже болды,- деді Светлана Сергоқызы.
Ақтілек Әлібекұлы,
Жәнібек ауданы
Zhaikpress.kz
