Спортпен айналысқан адам қашан да мықты, қай сәтте де төзімді, ширақ болады. Ал мына қасиеттер ел тізгінін ұстаған азаматтардан табылса, алаңдамауға болады. Өйткені өз-өзіне сенімді, денсаулығы мықтылар ғана ел ісіне білек сыбана кірісе алады. Мұны Жәнібек ауданы әкімдігі үнемі алға қойып жүр. Ауданда спорттың бірнеше түрінен жарыс өтіп, спортшыларға қолдау да көрсетіледі.
- Бұл өзге де ауылдарда жалғасады, - деді аудан әкімі Тимур Шиниязов.
Жуырда Талов ауылында волейболдан жолдастық кездесу өтті. Борсы, Жақсыбай, Талов ауылдары мен аудан әкімдігі қатысқан дода тартысқа толы болды. Аудан басшысы Тимур Серікұлы қатысушыларға сәттілік тілеп, бұқаралық спорттың дамуына жол ашатын жобалардың жалғасын табатынын жеткізді. Одан соң мектеп ұжымына, оқушыларға ойын доптарын тарту етті.
Әлібек Қаржау,
Жәнібек ауданы
zhaikpress.kz
