Казталов ауданы әкімі Асланбек Сарқұлов туған жеріміздің абыройын асқақтатып, байрағымызды көкке желбіретіп, ауданымыздың мерейін асырып жүрген жас спортшылар мен олардың жаттықтырушыларын қабылдады.
Шарада аудан әкімі Асланбек Ахметоллаұлы:
- Ауданымызда су тасқынының алдын алу шаралары жүргізіліп, тілсіз жаумен күрестен соң өздеріңізбен аман-есен қауышып отырғанымызға қуаныштымын. Жеңістеріңіз елдің ертеңіне деген сенім ұялатады. Спорт деген елдігімізді танытып, бірлігімізді көрсететін, еліміздің атын шығаратын бірден бір додалар. Қай жетістіктің артында үлкен еңбек тұр. Бұл сіздерге сенген бапкерлеріңіздің, ата-аналарыңыздың жеңісі деп білемін. Сол еңбектеріңіз еселене беріп, Азия олимпиадаларын бағындыра беріңіздер. Әрбіріңіздің жеңістеріңіз ауданымыз үшін қуанышты жағдай. Ауыл, аудан атын шығарып, ата-аналарыңыздың, бапкерлеріңіздің мерейін арттырдыңыздар! Қасиетті ораза айында, болып жатқан қиын кезде өздеріңізбен кездесіп жатқанымыз жақсылықтың бір нышаны деп білемін, - деді.
Алдағы бәсекелерде жеңісті күндеріңіз көп болсын деп, аудан әкімі жаттықтырушылар мен әрбір оқушыға алғысхаттар мен қаржылай сертификаттар табыс етті.
Республикалық додаларда ел намысын қорғап жүрген спортшыларымыз - 2024 жылғы жастар арасында спорттық самбодан ҚР қола жүлдегері және жауынгерлік самбодан ҚР чемпионы спорт шебері (Тараз қаласы 2024 жыл), жасөспірімдер арасында самбо күресінен ҚР чемпионы (Ақтау қаласы 2024 жыл) Элеонора Анарбекқызы, жасөспірімдер арасында самбо күресінен ҚР чемпионы (Тараз қаласы 2024 жыл) Эльнара Анарбекқызы, еркін күрестен жасөспірімдер арасында ҚР жеңімпазы Әділбек Ерболатов, еркін күрестен жасөспірімдер арасында ҚР күміс жүлдегері Ырысбек Тұрақбай, Панкратионнан жасөспірімдер арасында ҚР күміс жүлдегері Ильхам Қазиолла, жеңіл атлетикадан WINTER RUN 2024 халықаралық жүгіру жарысының жеңімпазы (Алматы қаласы) Сержан Нұржан мен ата-аналары қабылдау жасаған аудан басшысына алғыстарын білдірді.
Қабылдауда сөз алған аудандық орталық балалар-жасөспірімдер спорт мектебінің еркін күрес үйірмесінің жаттықтырушысы Мейрам Ғиляжев қабылдау жасаған аудан әкіміне алғысын білдірді.
Айта кету керек, ауданымыздың кәсіпкері, спорт жанашыры Айбынбек Абитов еркін күрестен жасөспірімдер арасында ҚР жеңімпазы Әділбек Ерболатов пен жаттықтырушысы Мейрам Ғиляжевқа ат мінгізіп, еліміздің байрағын көкке желбірететін спортшыларымыз шыға берсін деп ізгі тілегін білдірді.
Гүлнұр Бөлешова,
Казталов ауданы
zhaikpress.kz
