"Спорт қауымдастығының өкілдері «Дала қырандары» жастар қоғамдық бірлестігімен бірлесіп, Орал қаласының іргесіндегі су тасқынына қарсы жұмыстарға атсалысып жатыр. Жергілікті тұрғындарға 400 ерікті көмек көрсетіп жатыр", - деп хабарлайды ҚР туризм және спорт министрлігі.
Фото: www.gov.kz
Батыс Қазақстан облысына көмекке барған спортшылар қатарында Ербол Хамитов, Асхат Ділмұхамедов, Алмат Кебіспаев, Василий Тахтай, Фируза Шәріпова, Бейбіт Ыстыбаев, Сергей Цырульников және өзге де спортшылар бар. Олар Зачаганск кентінің маңындағы бөгеттерді нығайтуға көмектесіп жатыр. Спортшылар аталған акцияға қатыса отырып, бір-бірімен ынтымақтастықта жұмыс істеу, командалық рухты көтеру және өзгелерге көмектесу сияқты спорт құндылықтарының маңыздылығын көрсетуде. Ерікті спортшылар әр түрлі спорттың, атап айтқанда, аралас жекпе-жек, грек-рим және еркін күрес, грэпплинг, футбол, футзал секілді спорт түрлерінің өкілдері.
Естеріңізге сала кетейік, Туризм және спорт министрлігі «Дала қырандары» жастар қоғамдық бірлестігімен ынтымақтастық туралы меморандумға қол қойған болатын. Меморандумға сәйкес, спортшылар су тасқынынан зардап шеккендерге көмек көрсету мақсатында ерікті топ құрды.
