Еліміздегі футболды одан әрі дамытып, жас футболшылардың өзара күш сынасуына мүмкіндік беретін «Freedom QJ league» додасы Оралға келді.
Биыл аталмыш лиганың «В» дивизионында 2008 жылы туған футболшылар күш сынасуға мүмкіндік алды.
«Ақжайықтан» бөлек ол дивизионда «Оңтүстік», «Жетісу», «Алтай», «Елімай», «Ұлытау», «Қызылжар», «Оқжетпес» футбол клубтарының жастары бар. «QJ leaguе» сайысында өңір намысын қорғап жүрген команданы Ислам Шалаев баптайды.
Өткен аптада Жезқазған қаласына барып, жергілікті «Ұлытау» командасын жеңген Ислам Шалаев шәкірттері жексенбі күні өз алаңында көкшетаулық «Оқжетпес» командасымен кездесті.
Өз тобының қос көшбасшысының теке-тіресі жанкүйер қауымның үлкен қызығушылығын оятты.
«Ақжайық» стадионын толтырған жас футболшылардың қолдаушылары матч басынан соңына дейін команданы қолдаун тоқтатпады. Десе де бірінші болып есепті қонақтар ашты. Көп ұзамай Райыс Әбілов есепті теңестірсе, Тілеухан Елғон мен Рахым Тұрдалиев «Ақжайықтың» басымдығын екі допқа дейін ұлғайтты. Бірақ ойын соңында шаршаңқырап қалған алаң иелері қателіктерге бой алдырды. Қарсыласының осал тұсын тиімді пайдаланып кеткен қонақ команда есепті теңестірді. Осылай бір ұпайға қанағат еткен қос команда тең тарқасты.
Түгелбай Бисен,
zhaikpress.kz
