Шыңғырлау ауданының орталығынан 20 шақырым жердегі Ащысай ауылында 10 пәтерлік бес үйдің құрылысы жүріп жатыр. Мамыр айында іргетасы құйылған баспаналар қазан айында пайдалануға беріледі деген жоспар бар.
Үй салуды мойнына алған мердігер компания өкілдерінің айтуынша, қазір бес үйдің іргетасын құю жұмысы толық аяқталған. Екі үйдің тасы қаланып жатса, бір үйдің төбесін жабу жұмысы жүргізіліп жатыр. Екі үйдің құрылыс материалдары жеткізілді, қабырғасын көтеру жұмысы басталды.
Шыңғырлау ауданына келген облыс басшысы Нариман Төреғалиев аталған үйлердің құрылыс жұмысымен танысты.
Аудан әкімі Мұрат Өмірәлиевтің айтуынша, 273 шыңғырлаулық үй кезегінде тұр екен. Ащысайда бой көтеріп жатқан жаңа үйлер ең алдымен сол тұрғындарға беріледі.
– Үй құрылысын жоспарға сәйкес аяқтауды тапсырамын. Кезегін күткен ағайын қиналып қалмауы керек. Уақытында аяқтаймыз деп сапаны ұмыт қалдыруға тағы болмайды. Мейілінше жергілікті өндірушілер шығарған құрылыс материалдарын пайдаланған жөн, - деді Нариман Төреғалиұлы.
Сондай-ақ Ащысай ауылындағы ескі медициналық пункт басы ауырып, балтыры сыздаған ағайынға толыққанды медициналық қызмет көрсетуге бейім емес еді. Ауылға жаңа емдеу орны керек екені аудан ғана емес, облыс әкімінің есептік кездесуінде де көтерілді.
Өткен жылы аталған күрмеулі мәселенің шешімін табуды қолға алған өңір басшылығы «Ауылдық денсаулық сақтауды жаңғырту» бағдарламасы аясында ауылға жаңа ФАП салу мәселесін шешкен. Шілде айында құрылысы басталған ФАП қарашада халық игілігіне берілмекші.
Қазіргі таңда емдеу мекемесінің қабырғасы қаланып жатыр. Мердігер компания өкілі ауылға қажетті емдеу орнын салуға толықтай жергілікті өнім пайдаланылып жатқанын жеткізді.
– Біздің басты саясатымыз да жергілікті өндірушілерді қолдау. Ең бастысы уәделі уақытта құрылысты аяқтау және сапалы етіп салу, - деді өңір басшысы.
Түгелбай Бисен
Шыңғырлау ауданы
zhaikpress.kz
