Сырым ауданы Жымпиты ауылындағы №291 референдум учаскесінің алғашқы дауыс берушісі - марафоншы Жұмағұл Молдабеков.
Жұмағұл мырза биыл – 59 жаста. Бірақ санасы сергек, қимылы ширақ. Оның құпиясы - спорт.
Жұмағұл Молдабеков 2000 жылдан беру жүгірумен айналысады. Таңмен таласып тұрып, күнді қыраттың басынан қарсы алу - марафоншының күнделікті жұмысы.
Желаяқ сүйікті әдетін еліміздегі саяси оқиға сәтінде де ұмытқан жоқ. Ол 6 қазан - Референдум күнінің құрметіне 6 шақырымды жүгіріп өтіп, учаскеге сағат 07:00-де жетіп үлгерді.
«Мен өз дауысымды бердім!» деген жазбасы бар жейдесімен ауылдастарын және елді бірінші салауатты өмір салтына, екіншіден азаматтық белсенділікке үндеп отыр.
Айта кетейік, Жұмағұл Молдабеков - «Syrym RUNNERS» жүгіру тобының жетекшісі.
Қоңдыкер Елеуов,
Сырым ауданы
zhaikpress.kz
