Подстепный ауылында тағы бір тарихи оқиға болды. Расы керек, көпті көрген қариялар азайып барады. Санаулы қарттарды құрметтеу, ізет білдіру – бұлжымас парыз. №367 учаскесінде тіркелген ғасыр жасаған Мақпал Мұқанғалиева да өз таңдауын жасады.
Аталмыш учаскенің комиссия мүшелері Қанат Ермұқанов пен Амандық Хайруллин әжейдің шаңырағына арнайы барып, референдумға қойылған сауал бойынша дауысын алды. Тағдыр тауқыметін тартса да, қиындыққа мойымай алты бірдей баланы қиын-қыстау кезеңде өз күшімен өсірген асыл ана ел болашағының жарқын боларына кәміл сенеді.
Жүзге келсе де тың қалыппен алғыс жаудырған ол дауысын беріп болған соң ағынан жарылып, батасын берді.
–Ел-жұртым аман болсын, бала-шағаң,
Жоғары болсын жұлдызың,
Аман болсын ұл-қызың,
Дәулетті, малды бол,
Жұқармас жалды бол,
Мақтанатын достарыңның алды бол,
Қазағымның даласына ырыс қонсын,
Еліміз аман, жұртымыз тыныш болсын,- деді ақжаулығы сынды ақ батасында.
Ақтілек Әлібекұлы,
Теректі ауданы
