Бөкей ордасы ауданындағы М.С.Бабажанов атындағы орта мектепте ауыл оқушылары үшін IQanat олимпиадасының бірінші туры өтті.
Олимпиаданың іріктеу кезеңіне аудан бойынша 8-сыныптардың 93 білім алушысы тіркелген болса, оның 82-сі (88%) қатысып, бақ сынады.
IQanat – 150-ден астам қазақстандық кәсіпкердің Қазақстанның барлық өңіріндегі ауыл оқушыларын қолдауға арналған әлеуметтік-білім беру жобасы.
Айта кетсек, бұл олимпиада облыстың барлық ауданында өтті, оған 2 140 оқушы қатысты.
Аталмыш олимпиаданың дәстүрлі тестілеуден айырмашылығы сол, тапсырмалар оқушылардың логикалық, математикалық және кеңістіктік ойлау, оқу сауаттылығы және қазақ тілін меңгеру сияқты қабілеттерін бағалауға бағытталған.
Олимпиаданың бірегейлігі – академиялық жетістіктер мен мектептегі бағаларға қарамастан, әркімнің іріктеуге қатысу мүмкіндігі бар. Барлық оқушыға тең құқық беретін IQanat олимпиадасы жетінші рет өткізілді.
Қазақстанның 170 ауданынан 56 мыңнан астам ауыл оқушысы тіркелді. Бірінші тур барысында облыстық кезеңдерге қатысушылар іріктеліп алынады, оның ішінде жеңімпаздар 2025 жылдың жазында финалда кездеседі.
Финалистерді қарқынды білім беру бағдарламасы күтеді, оған ағылшын тілін оқыту, IT жобалары, менторлық, кәсіптік бағдар беру, ҰБТ, IELTS және т.б. дайындық кіреді.
Осындай күшті академиялық дайындықтың арқасында IQanat бағдарламаларымен қамтылған балалар Қазақстанның және шетелдің үздік университеттеріне грантқа түседі.
Қазір IQanat түлектері әлемнің 17 елінде білім алып жатыр.
«Ауылдан – арманға» ұранымен биік белестерге қол созған балғын шәкірттерімізге сәттілік тілейміз.
Анар Артықбай
Бөкей ордасы ауданы
