Облыс әкімі Нариман Төреғалиев бүгін жастармен кездесу өткізіп, аймақтың әлеуметтік-экономикалық және мәдени дамуында жастардың рөлі мен қоғамға қосар үлесі туралы пікір алмасты. Кездесу еркін форматта өтіп, жастар өздерінің ұсыныс-пікірлерін ашық білдіріп, болашақ даму жөніндегі көзқарастарын ортаға салды. Бұл туралы БҚО ҚДБ хабарлады.
Өңір басшысы жастарды өз идеялары мен ұсыныстарын еркін айтуға шақырып, олардың бастамаларын қолдайтындығын білдірді. Жастар, өз кезегінде, облыстың әлеуметтік, мәдени тұрғыда өсуіне бағытталған көптеген құнды ойлар мен ұсыныстарын ортаға салды.
Кездесуде айтылған пікірлердің арасында жас өнерпаздар мен қоғамдық белсенділердің ойлары ерекше маңызды болды. Биылғы жылғы Жайдарман ойындарының Жоғарғы лигасында жеңіске жеткен «Талант» жайдарман тобының мүшелері, «Дарын» жастар сыйлығының лауреаты, Орал қалалық жастармен жұмыс жөніндегі ресурстық орталықтың басшысы Дулат Жүсіпқалиев, «Қаладан-ауылға» жобасы бойынша ауылдық жерден кәсіп ашып, мал шаруашылығымен айналысып жүрген кәсіпкер Шарипа Базарбаева, жас ақын, көптеген хит әндердің авторы Дәурен Шамұратов және «Ғасыр» жастар қоғамдық бірлестігінің өкілі Тасболат Серікқалиев сөз сөйледі.
Кездесу барысында жастар тек өз ойларын ғана білдіріп қоймай, келер жылға арналған жоспарлары мен бастамаларын да ортаға салды. Олардың әрқайсысы өз саласындағы жетістіктер мен болашаққа деген үлкен жоспарларын атап өтіп, облыстың дамуына қалай үлес қоса алатынын талқылады.
Кездесудің соңында жас ақын, «Ақпарат саласының үздігі», Қазақстан Жазушылар Одағының мүшесі Әділет Орынбасаров өз шығармашылығынан «Ақжайығым» атты өлеңін оқып, жиналған жастарды бір серпілтіп тастады. Ақынның шығармасы аймақтың мәдени өміріне деген жастардың ынта-ықыласын арттырды.
Айта кететін жайт, биылғы жылы БҚО Қоғамдық даму басқармасының тапсырысымен өңірдің 32 жас ақындардың шығармашылығын «Ақжайықтың аспаны» атты кітаптың тұсаукесер рәсімі өткен болатын. Бүгінгі кездесу барысында аталған жыр жинақ өңір басшысына ұсынылды.
Бұл кездесу жастардың өз ойларын ашық білдіріп, қоғамдық өмірге белсене араласуына мүмкіндік беретін маңызды алаң болды. Облыс басшысы мен жастар арасындағы еркін пікір алмасу аймақтың болашақ дамуына бағытталған тың идеялардың пайда болуына ықпал ететіні сөзсіз.
